Ўзбекистонда тадбиркорлар учун “Иккинчи имкон” иқтисодий амнистияси эълон қилинади

3 соат олдин

Ўзбекистонда кичик ва ўрта тадбиркорлик субьектлари учун "Иккинчи имкон" деб номланган иқтисодий амнистия жорий этилиши маълум қилинди. Ушбу тартиб 2026-йил 31-декабргача амал қилади.

Амнистия шартларига кўра, агар тадбиркорлар амнистия эълон қилингунга қадар юзага келган солиқ қарзини 2026-йил 31-декабргача тўлиқ тўласалар, ушбу қарздорлик бўйича ҳисобланган пеня бекор қилинади ва унга боғлиқ ижро ишлари якунланади. Шунингдек, тадбиркор аввал топширган солиқ ҳисоботига мустақил равишда тузатиш киритиб, қўшимча ҳисобланган солиқни белгиланган муддатгача тўлиқ тўлаган тақдирда, ушбу суммага пеня ҳисобланмайди.

Иқтисодий амнистия доирасида тадбиркорлар солиқлар ва йиғимларни тўлаш учун тўлов топшириқномасини банкка тақдим этмаганлик учун маъмурий жавобгарликдан озод этилади. Амнистия доирасида йўл қўйилган хатоларни мустақил равишда бартараф этган тадбиркорларнинг барқарорлик рейтингидаги баллари ҳам пасайтирилмайди.

Бундан ташқари, 2026-йил 1-январгача шаклланган айрим қарздорликлар ҳисобдан чиқарилади. Жумладан, солиқ ҳисоботини ўз вақтида тақдим этмаганлик учун қўлланилган маъмурий жарималарнинг тўланмаган қисми ҳамда қатъий белгиланган миқдорда айланмадан олинадиган солиқни тўловчи субьектларга қўлланилган молиявий жарималарнинг тўланмаган қисми бекор қилинади.

Шунингдек, аввал тузилган меҳнат шартномаларини Ягона миллий меҳнат тизимига киритишга рухсат берилади. Уларни кечиктириб киритганлик учун тадбиркорларга жарима қўлланмайди.

uzbekistan penalties tax reporting entrepreneurs tax debt administrative liability small and medium businesses economic amnesty