Ўзбекистонда стартапларни молиялаштиришнинг янги дастури йўлга қўйилади
Ўзбекистонда 2027 йилдан стартапларни молиялаштириш ва хусусий инвестицияларни рағбатлантиришга қаратилган янги дастур ишга туширилади.
Ўзбекистонда стартапларни молиялаштириш бўйича янги дастур ишга туширилади
Ўзбекистонда 2027 йилдан бошлаб стартапларни молиялаштириш ҳамда хусусий инвестицияларни рағбатлантиришга йўналтирилган янги дастур жорий этилади. Тегишли чора-тадбирлар Президент Шавкат Мирзиёевнинг тадбиркорлар билан ўтказилган ВИ очиқ мулоқоти якунлари асосида имзоланган фармонда белгиланган.
«Келажак тадбиркори» дастури 2027–2030 йилларда амалга оширилади. Унинг доирасида Миллий венчур фонди УзВС танлов асосида саккизта устувор йўналиш бўйича 30 тагача стартапни молиялаштириши мумкин.
Саралаб олинган ҳар бир лойиҳа уч йил муддатга 5 миллиард сўмгача инвестиция олиши мумкин. Молиялаштириш фоизсиз ва гаровсиз конвертация қилинадиган қарз ёки САФЕ шаклида берилади.
Давлатнинг стартап капиталидаги улуши 49 фоиздан юқори бўлмаслиги керак. Шу билан бирга, асосчилар кейинчалик давлат улушини бозор қиймати бўйича сотиб олиш имкониятига эга бўлади.
Дастурни амалга оширишнинг дастлабки босқичида, 2027 йилда давлат бюджетидан 150 миллиард сўм ажратиш режалаштирилган.
Қўллаб-қувватлаш электротехника, машинасозлик ва ускуналар ишлаб чиқариш, фармацевтика, кимё саноати, қурилиш материаллари, сув ва энергия тежовчи технологиялар, қишлоқ хўжалиги ва агротехнологиялар, шунингдек, аерокосмик технологиялар йўналишида фаолият юритаётган стартапларга татбиқ этилади.
Дастур иштирокчилари учун махсус «тартибга солиш қум қутиси» ҳуқуқий режими жорий қилинади. Бундан ташқари, тегишли давлат органлари ва тармоқ ташкилотлари стартапларга пилот синовларни ўтказиш ҳамда буюртмалар жойлаштириш учун корхоналар билан шартномалар тузишда кўмаклашади.
Стартаплар экотизимига хусусий капитални жалб этиш бўйича ҳам алоҳида чоралар кўзда тутилган. Ягона электрон Стартуп Басе платформасида рўйхатдан ўтган стартапга, жумладан, САФЕ ёки конвертация қилинадиган қарз орқали инвестиция киритган жисмоний шахс стартап-инвестор, яъни Бусинесс Ангел мақомини олиши мумкин.
Инвестор стартапдаги ўз улушини камида уч йил сақлаб қолган тақдирда, уни кейинчалик сотишдан олган даромади жисмоний шахслардан олинадиган даромад солиғидан озод қилинади.
Янги механизмлар технологик лойиҳаларни молиялаштириш имкониятларини кенгайтириш, хусусий инвесторлар иштирокини ошириш ва стартапларни бозорга олиб чиқиш жараёнини тезлаштиришга қаратилган.
Дастур Ўзбекистон стартаплар экотизимини янада ривожлантиришнинг бир қисмига айланади. Унда ИТ Парк Узбекистан технологик лойиҳаларни қўллаб-қувватлаш, венчур бозорини ривожлантириш ҳамда стартаплар ва инвесторлар ўртасида ҳамкорлик учун инфратузилма яратишда иштирок этади.
Фармон 2026 йил 28 августдан кучга кирган.