Ўзбекистонда саккиз ойда гиёҳвандлик билан боғлиқ 12 мингдан ортиқ жиноят аниқланди

Ўзбекистонда саккиз ой ичида гиёҳвандлик билан боғлиқ 12 мингдан ортиқ жиноят фош этилди

2026-йилнинг саккиз ойида Ўзбекистонда гиёҳвандлик воситалари, психотроп ва кучли таъсир қилувчи моддаларнинг ноқонуний айланиши билан боғлиқ 12 104 та жиноят ҳамда 1 410 та маъмурий ҳуқуқбузарлик аниқланган. Бу ҳақда Наркотиклар ва ўқотар қуролларни назорат қилиш агентлиги маълум қилди.

Ҳисобот даврида 89 та йирик наркожиноий гуруҳнинг фаолиятига чек қўйилган. Улардан 1,4 тонна анъанавий ва 61,7 килограмм синтетик гиёҳвандлик воситалари, шунингдек, 4,6 миллион дона психотроп ва кучли таъсир қилувчи моддалар олиб қўйилган. Тезкор ҳамда профилактик тадбирлар натижасида жами 2 тонна 708 килограмм гиёҳвандлик воситалари, психотроп ва кучли таъсир қилувчи моддаларнинг ноқонуний муомаласи тўхтатилган.

Шунингдек, 15 та онлайн нарко-дўкон фаолияти тугатилиб, 630 мингдан ортиқ обуначига эга 1 911 та интернет ресурси блокланган. Улар орасида 609 та Телеграм-бот, 1 004 та ёпиқ ва 298 та очиқ канал, гуруҳ ҳамда чатлар бор. Синтетик наркотиклар тайёрлашда ишлатиладиган 10,5 тонна прекурсор мусодара қилиниб, 18 та ноқонуний нарко-лаборатория фош этилган.

Наркожиноят содир этган 7 316 нафар шахс ушланган. Уларнинг 77 нафари вояга етмаганлар, 607 нафари аёллар, 2 346 нафари ёшлар, 1 296 нафари муқаддам судланганлар ва 610 нафари ишсизлардан иборат. 127 нафар хориж фуқаросининг ҳам бундай жиноятларга алоқадорлиги аниқланган.

Гиёҳвандликнинг олдини олиш доирасида аҳолига, айниқса ёшларга қаратилган 831,6 мингта тарғибот ва тарбиявий-профилактик тадбир ўтказилган. Уларга 17,2 миллион нафар аҳоли, жумладан 11,6 миллион нафар ёш жалб этилган. ОАВ ва интернетда гиёҳвандлик ҳамда наркожиноятларнинг оқибатлари ҳақида 209,1 мингта материал ёритилган.

Ҳолат юзасидан жиноий гуруҳга нисбатан Жиноят кодексининг 273-моддаси 5-қисми билан жиноят иши қўзғатилган.