Ўзбекистонда қимор тарғиб қилинган 50 дан ортиқ сайт блокланди
Ўзбекистонда қимор ўйинлари ва таваккалчиликка асосланган ўйинларни тарғиб қилувчи 50 дан ортиқ веб-сайт блокланди. Бу ҳақда Рақобат қўмитаси маълум қилди.
Қўмита хабарига кўра, бу 2026-йилнинг биринчи ярмида блокланган сайтлар сони бўлиб, шу давр мобайнида 76 та веб-сайтга нисбатан чора кўриш бўйича ваколатли органларга сўровлар юборилган.
Қўмита ўтган даврда рекламалар бўйича жами 13,5 мингдан ортиқ ўрганишлар ўтказган, уларнинг қарийб 6 мингтасида қонунбузилиш ҳолатлари аниқланган. Хусусан, 545 та дори воситалари ва биологик фаол қўшимчалар рекламасининг 51 таси қонун талабларига жавоб бермаслиги аниқланган. Шунингдек, 250 га яқин ҳолатдан 54 тасида тамаки, алкогол, электрон сигарет, пиво каби тақиқланган маҳсулотлар рекламаси жойлаштирилгани маълум бўлган. Ўтказилган 165 та мониторинг натижасида 82 та ҳолатда тотализатор ва букмекерлик рекламаси қайд этилган.
Ижтимоий тармоқлардаги ўрганишларда катта аудиторияга эга бўлган 3 нафар блогер (вайнер) ўз саҳифаларида қимор ва букмекерлик хизматларини тарғиб қилувчи саҳна кўринишдаги видео-роликларини жойлаштиргани аниқланиб, уларга нисбатан маъмурий баённома расмийлаштирилган.
Юқоридаги ҳуқуқбузарлик ҳолатларини бартараф этиш бўйича тезкор чоралар кўрилиб, 83 та субьектга нисбатан белгиланган таъсир чоралари қўлланилган. Бундан ташқари, айрим дори воситалари ва тиббий буюмлар ишлаб чиқарувчи ҳамда реализация қилувчи компаниялар томонидан дори воситалари рекламасида миллий ва оилавий анъаналарга, шунингдек, ахлоқ ва маънавиятнинг умум қабул қилинган нормаларига зид бўлган шакллар, иборалар ва образлардан фойдаланилган ҳолатлар ҳам аниқланган.
Бу ҳолат қўмита томонидан ўрганилиб, реклама ролиги юзасидан ваколатли давлат органидан тегишли хулоса олинган. Тақдим этилган хулосага кўра, реклама ролигининг мазмуни ва унда тасвирланган ҳолатлар ахлоқ ва маънавиятнинг умум қабул қилинган нормаларига зид экани қайд этилган.
Қўмита томонидан рекламанинг экспертиза ва таҳлиллари ўтказилганда жами 18 мингдан ортиқ рекламанинг 25 фоизига реклама тўғрисидаги қонунчилик талабларига номувофиқлиги ҳақида хулосалар берилган.
2026-йил давомида қўмитанинг ОАВ, Телеграм гуруҳлари ва каналлари, “.уз” доменида рўйхатдан ўтган веб-сайтлар админлари ҳамда реклама агентликларига, шунингдек, реклама берувчи, тайёрловчи, тарқатувчи ва буюртмачиларни қонун талабларига риоя этилишини таъминлаш ва қонунбузилишларнинг олдини олиш мақсадида турли соҳа ва йўналишларда 10 мингга яқин огоҳлантириш ва сўровлари юборилган.
“Реклама тўғрисида”ги қонуннинг 46-моддасида қимор ўйинлари ва таваккалчиликка асосланган бошқа ўйинлар, шу жумладан, телекоммуникация тармоқларидан, шунингдек, интернет жаҳон ахборот тармоғидан фойдаланган ҳолда ташкил этиладиган қимор ўйинлари ва таваккалчиликка асосланган бошқа ўйинлар рекламасига йўл қўйилмаслиги белгиланган. 2025-йилда Ўзбекистонда букмекерлик хизматларини тарғиб қилган 70 га яқин сайт блокланганди.