Ўзбекистонда маҳаллаларнинг энергетик паспортлари яратилади
Ўзбекистонда ҳар бир маҳалла учун электр ва газ таъминоти маълумотларини бирлаштирувчи энергетик паспортлар шакллантирилади.
Ўзбекистонда ҳар бир маҳалла учун электр ва табиий газ таъминотига оид муҳим маълумотларни ўз ичига олувчи энергетик паспортлар жорий этилади. Бу ҳақда Ўзбекистон Энергетика вазирлиги маълум қилди.
Ушбу паспортлар энергетика инфратузилмасининг ҳолатини баҳолаш, ресурслар истеъмолини таҳлил қилиш ва тармоқларни ривожлантириш бўйича қарорлар қабул қилишда муҳим восита бўлиб хизмат қилади.
Энергетик паспортда истеъмолчилар сони ва таркиби, истеъмол ҳажми, мавжуд қувватлар, электр ва газ инфратузилмасининг таркиби ҳамда техник ҳолати, янги истеъмолчиларни тармоққа улаш имкониятлари ва модернизацияга бўлган эҳтиёж каби маълумотлар акс этади.
Тўпланган маълумотлар ҳар бир маҳаллада энергия ресурсларининг тақсимланиши ва истеъмолини таҳлил қилиш имконини беради. Хусусан, улар ёрдамида техник ва тижорий йўқотишлар юқори бўлган ҳудудлар, истеъмол ҳажмининг кескин ёки ноодатий ўзгаришлари, ҳисобга олинмаган истеъмол, шунингдек, ноқонуний ёки техник талабларга мос келмайдиган уланишларни аниқлаш режалаштирилмоқда.
Паспорт, шунингдек, тармоқларга тушаётган юклама, қувват захираси ва уларнинг техник ҳолатини бир жойда баҳолаш имконини беради. Бу авариявий ҳолатлар юзага келиш хавфини олдиндан баҳолаш, уларнинг олдини олиш чораларини кўриш ва зарурат туғилганда энергия таъминотини тезроқ тиклашга ёрдам бериши кутилмоқда.
Энергетика вазирлиги мисол тариқасида тармоқнинг захира имкониятларидан фойдаланиш орқали қувватни тезкор қайта тақсимлаш имкониятини келтирмоқда. Бу юкламани бошқа йўналишга ўтказиш бўйича қарор қабул қилиш ва истеъмолчиларни узоқ вақт давомида энергия таъминотисиз қолдирмаслик имконини беради.
Энергетик паспортларни шакллантиришда янги кўп қаватли уйлар, ижтимоий обьектлар, корхоналар ва ишлаб чиқариш майдонларининг пайдо бўлиши билан боғлиқ келгусидаги қўшимча юклама ҳам ҳисобга олинади. Агар мавжуд қувватлар етарли бўлмаса, қайси тармоқ ёки трансформаторни кучайтириш зарурлиги, қаерда қўшимча инфратузилма талаб қилиниши ва бунинг учун қанча ресурс керак бўлишини аниқлаш мумкин бўлади.
Шу тариқа, энергетик паспорт нафақат маълумотларни йиғиш тизими, балки бошқарув воситаси сифатида ҳам кўриб чиқилмоқда.
У энергиянинг ҳаракати ва истеъмоли, йўқотишлар, тармоқларнинг ҳолати ҳамда улар билан боғлиқ хавфларни комплекс баҳолаш, муаммолар сабабларини аниқлаш, тезкор қарорлар қабул қилиш ва инфратузилмани келгусида ривожлантиришни режалаштириш имконини бериши керак.
Вазирлик бундай ёндашувнинг асосий вазифаси сифатида аллақачон юзага келган муаммоларга жавоб қайтаришдан уларнинг сабаблари ва хавфларини олдиндан баҳолаш, қувватни тезкор қайта тақсимлаш, таъминотни тиклаш ҳамда инфратузилмани ўз вақтида кучайтиришга ўтишни белгиламоқда.