Ўзбекистонда инвесторлар учун ер сотиб олиш тартиби соддалаштирилади
Давлат кўчмас мулки харидорлари учун ерни расмийлаштириш соддалаштирилади: обьект билан боғлиқ ерга бўлган ҳуқуқ у хусусийлаштирилгунига қадар, ижарани қайта расмийлаштирмасдан сақланиб қолади. Ауксиондаги ерлар “тайёр пакет” тамойили асосида тайёрланади.
Ўзбекистонда инвесторлар учун ер харид қилиш тартиби енгиллаштирилади
Ўзбекистонда ер участкаларини ауксионга чиқаришга тайёрлашнинг янги механизми жорий этилмоқда. Бу президентнинг 28-августдаги иқтисодиётда давлат иштирокини қисқартириш ва хусусийлаштиришни жадаллаштириш тўғрисидаги фармонида назарда тутилган.
Ҳужжатга мувофиқ, маҳаллий архитектура-шаҳарсозлик кенгашлари таклиф қиладиган участкалар “тайёр пакет” тамойили асосида — муҳандислик тармоқларига уланиш бўйича олдиндан тайёрланган техник шартлар ва қурилишга рухсатнома ҳужжатлари билан бирга шакллантирилиши режалаштирилган.
Бундай пакетни тайёрлаш харажатлари маҳаллий буджетлар ҳисобидан қопланиши мумкин. Кейинчалик бу харажатлар ер участкаси ауксионга қўйилганда унинг бошланғич нархига қўшилади.
Шунингдек, участкаларни сотиш режалаштирилаётган ҳудудлар учун мастер-планларни олдиндан ишлаб чиқиш ва тасдиқлаш ҳам кўзда тутилган. Инвесторларга сотиш учун муайян ер участкалари айнан шу мастер-планлар асосида шакллантирилади.
Фармон давлат кўчмас мулкини хусусийлаштиришда ерни расмийлаштириш тартибини ҳам ўзгартиради.
Агар харидор давлат обьектини сотиб олса, у билан боғлиқ ер участкасига бўлган ҳуқуқ ернинг ўзи хусусийлаштирилгунига қадар унда сақланиб қолади. Бунда ушбу участкага бўлган ижара ҳуқуқини қайта расмийлаштириш талаб қилинмайди.
Уч ойдан ортиқ вақт давомида савдоларда сотилмаган қишлоқ хўжалигига мўлжалланмаган бўш турган ер участкалари учун алоҳида механизм назарда тутилган.
Бундай ҳолатларда, эълон қилинган лойиҳа амалга оширилиши шарти билан, участкага бўлган ҳуқуқ инвестор иштирокида ташкил этилаётган хўжалик жамиятининг устав капиталига киритилиши мумкин.
Кейинчалик ушбу компаниядаги давлат улуши айнан шу инвесторга сотиб олиш учун таклиф этилиши мумкин.
Инвестиция ва ижтимоий мажбуриятларини тўлиқ бажарган Тошкент саноат зоналари иштирокчиларига ўзлари эгаллаб турган ер участкаларини, шунингдек, уларда жойлашган бино ва иншоотларни белгиланган тартибда хусусийлаштиришга рухсат берилади.
Давлат банкларига ҳам сотувга қўйилаётган давлат активлари ва ер участкаларини тадбиркорлик лойиҳаларига фаолроқ жалб этиш топширилди.
Бунинг учун “лойиҳалар фабрикаси” ёндашуви қўлланади — банклар потенсиал инвесторлар учун ушбу активлар бўйича бизнес-таклифларни тайёрлаш ва илгари суришга кўмаклашиши керак.
Янги механизмлар кенгайтирилган хусусийлаштириш дастурига киритилган бўлиб, унинг доирасида ҳукумат тадбиркорлик ва шаҳарсозлик мақсадлари учун 8000 гектарга яқин ер участкаларини савдога чиқаришни режалаштирмоқда.