Ўзбекистонда эски автомобил шиналаридан йўл қурилишида фойдаланилади
Резина билан модификацияланган битум (РМБ) ишлаб чиқариш технологиясини жорий этишда Венгрия компанияси билан ҳамкорлик ўрнатилади
Ўзбекистонда эски автомобил шиналаридан йўл қурилишида фойдаланилади
Венгриянинг «МОЛ Гроуп» компанияси ва Ўзбекистоннинг «ШБ РОАД ИНВЕСТ» компанияси мамлакатимизда йўл қурилиши учун резина билан модификацияланган битум (РМБ) ишлаб чиқариш технологиясини жорий этиш бўйича келишувга эришди.
Бу ҳақдаги музокаралар Будапешт шаҳрида Ўзбекистон элчихонаси кўмагида ташкил этилган учрашувда ўтказилди. Кўриб чиқилаётган лойиҳанинг қиймати 35 миллион долларга баҳоланмоқда.
Мазкур технология эски автомобил шиналарини қайта ишлаш орқали олинадиган резина увоқларидан йўл битумига қўшимча сифатида фойдаланишни назарда тутади. Бу эса йўл қурилиши материалларини ишлаб чиқаришда иккиламчи хомашёдан фойдаланиш имконини беради.
Музокаралар якунида «ШБ РОАД ИНВЕСТ» компанияси лойиҳа бўйича Ўзбекистон томонидан ҳамкор сифатида жалб этилди. Томонлар технологияни мамлакатимизда жорий этиш имкониятларини биргаликда ишлаб чиқиш бўйича ҳамкорлик меморандумини имзолади.
Лойиҳа амалга оширилиши натижасида замонавий йўл қурилиши материаллари ишлаб чиқаришни ривожлантириш, эски автомобил шиналарини қайта ишлаш ҳажмини ошириш ҳамда Ўзбекистон ва Венгрия корхоналари ўртасидаги технологик ҳамкорликни кенгайтириш кўзда тутилган.