Ўзбекистонда 21−27-сентабр кунлари об-ҳаво қандай бўлади? Газета шарҳи

Ўзбекистонда 21−27-сентабр кунлари об-ҳаво қандай кечади? Газета шарҳи

Ҳафтанинг иш кунларида жанубий вилоятлар ҳамда Бухоро ва Навоий вилоятларидан ташқари ҳудудларда ҳаво ҳарорати энг кўпи билан +32 даражагача кўтарилади. Бу ҳолат ҳудудда устун бўлиши кутилаётган иссиқ ҳаво оқими билан боғлиқ.

Пайшанбадан бошлаб шимолга, жумадан эса бошқа ҳудудларга кириб келадиган антициклон чеккаси айрим жойларда ҳароратни аввалги кунларга нисбатан 2−3 даражага пасайтиради. Ҳафта бошида водийнинг айрим ҳудудлари ва тоғларни ҳисобга олмаганда, жорий ҳафта ҳам қуруқ ўтиши прогноз қилинмоқда.

Хорижий об-ҳаво бюроси маълумотларига кўра, 21−25-сентабр кунлари Ўзбекистоннинг жуда катта қисмида иссиқ ҳаво оқими таъсири сабаб ўртача ҳарорат кўп йиллик иқлимий меъёрдан 2−4 даража юқори бўлади.

Ўзгидрометнинг ҳафта кунлари учун тузган прогнозига кўра, душанба куни республиканинг тоғли ҳудудлари ва водийнинг айрим жойларида, сешанба-пайшанба кунлари эса тоғли ҳудудларни ҳисобга олмаганда, ҳафта давомида республикада ёғингарчилик бўлмаслиги кутилмоқда. Қуйидаги прогноз харитасида ҳафта давомида жойларда кутилаётган умумий ёғингарчилик акс этган.

Ҳафтанинг иш кунларида тоғли ҳудудларда тунги ва тонгги пайтларда +10…15 даража, бошқа вилоятларда +13…+18 даража илиқ бўлиши прогноз қилинмоқда. Кундузги вақтларда ҳафта бошида тоғларда +20…+25 даража, Бухоро, Навоий ва жануб вилоятларида +35…+37 даражагача, бошқа вилоятларда эса +33 даражагача иссиқ бўлиши кутилмоқда.

Пайшанба куни шимолда кундузги ҳарорат нари борса +30 даражагача тушади, жума кунидан бошлаб эса жануб вилоятларидан ташқари бошқа ҳудудларда ҳам кундузги ҳарорат +30 даражагача кўтарилиши кутилмоқда. Дам олиш кунларида ҳаво ҳарорати яна пасаяди.

Ўзгидрометнинг бошқа бир ахбороти ҳамда Европа ўрта ва узоқ муддатли об-ҳаво прогноз маркази (ЭСМВФ) прогнозларига кўра, ушбу ҳафта республиканинг катта қисмида ўртача ҳаво ҳарорати шу даврга хос меъёрдан 1−3 даража, Хоразм вилояти ва Қорақалпоғистонда 3−6 даража юқори бўлади, ёғингарчилик миқдори эса Фарғона вилояти жанубий туманларидан ташқари бошқа қисмларда меъёрдан анча кам бўлади.

Демак, ҳафта кунлари бироз иссиқроқ бошланса, дам олиш кунларида сезиларли салқин кузни ҳис қилиш мумкин.

Жума ва дам олиш кунлари республика бўйлаб антициклон таъсирида ҳаво ҳароратининг пасайиши ва ҳавода намликнинг ортиши, бунинг устига Тошкент ва водий вилоятлари каби аҳолиси зич яшайдиган ҳудудларда шамолсиз омил ҳавода майда чанг заррачаларининг кўпайишига олиб келиши мумкин.

Нафас олиш касалликлари ва аллергик қўзғалишларга мойил инсонлар учун бундай об-ҳаво бироз ноқулайлик туғдириши мумкин. Шу билан бирга, бу ҳолат астма ва бронхиал касалликлари борларда симптомларни кучайтириши, йўтал чақириши, томоқ ва кўзни қичиштириши, нафас қисишига сабаб бўлиши, юрак-қон томир касалликлари борларда эса юкламани ошириши мумкин.

Иш кунларида кундузги илиқ ва нисбатан қуруқ ҳаво аксар ҳудудларда аҳоли учун қулай шароит яратади. Дам олиш кунларида эса, айниқса, кечаси ва тонгда ҳароратнинг пасайиши сезилади.

Қуёш фаоллиги бўйича мавжуд прогнозлар бу ҳафта ўрталарида “қизил” хавф даражасидаги геомагнит бўрони эҳтимоли юқори эканини кўрсатмоқда.

Хусусан, чоршанба куни “қизил” хавф даражасидаги магнит бўрони хавфи мавжуд. Иш ҳафтасининг бошқа кунлари учун асосан “сариқ” даражадаги магнит бўрони прогноз қилинмоқда. Магнит бўронининг кишилар саломатлигига таъсири ҳақида фанда ҳануз аниқ хулосалар йўқ. Шунинг учун бундай космик таъсир кишилар саломатлигига аниқ таъсир этади, дейиш нотўғри.

Ўзгидромет агентлиги ҳафта давомида кучли шамоллар бўлишини кутмаяпти. Жумадан антициклон таъсирида шамолнинг сусайиши ва атмосферанинг турғунлашиши айрим ҳудудларда, айниқса Тошкент ва водийда ҳаво сифатининг вақтинча ёмонлашиши учун шароит яратиши мумкин. Ҳавода чанг заррачаларининг кескин ортиши учун ҳозирча кучли метеорологик омиллар кўринмаяпти.

Шундай қилиб, 21−27-сентабр кунлари Ўзбекистонда об-ҳаво деярли бир маромда барқарор қолади.