Ўзбекистон яна бир халқаро конвенсияга қўшилмоқда
Парламентда БМТнинг медиация бўйича конвенсиясига Ўзбекистоннинг қўшилиши тўғрисидаги қонун лойиҳаси кўриб чиқилди
Ўзбекистон яна бир халқаро конвенсияга аъзо бўлиш арафасида. Олий Мажлис Қонунчилик палатасининг йиғилишида "Бирлашган Миллатлар Ташкилотининг медиация натижасида эришилган халқаро келишув битимлари тўғрисидаги конвенсиясига Ўзбекистон Республикасининг қўшилиши ҳақида"ги қонун лойиҳаси биринчи ўқишда кўриб чиқилди.
Ушбу ҳужжат Ўзбекистоннинг "Медиация бўйича Сингапур конвенсияси"га қўшилишини назарда тутади. Конвенсия халқаро тижорий низоларни медиация йўли билан ҳал қилиш натижасида эришилган келишувларни иштирокчи давлатларда тан олиш ва ижро этиш учун ягона ҳуқуқий механизмларни белгилайди.
Лойиҳада таъкидланишича, агар ўзбекистонлик тадбиркор хорижий ҳамкори билан низони медиация орқали ҳал қилиб, келишувга эришса, ушбу келишувни Конвенсия иштирокчиси бўлган бошқа давлатда ижро этиш тартиби сезиларли даражада соддалашади.
Қонун лойиҳасида Конвенсияни қўллаш билан боғлиқ айрим шартлар ҳам кўзда тутилган. Хусусан, Ўзбекистон Республикаси, давлат органи ёки давлат органи номидан ҳаракат қилувчи шахс тараф бўлган келишувларга Конвенсия қоидаларини татбиқ этмаслик таклиф қилинмоқда.
Шунингдек, Конвенсия фақат келишув тарафлари уни ўзаро муносабатларига нисбатан қўллашга рози бўлган тақдирдагина амал қилиши белгиланмоқда.
Мажлисда қайд этилишича, Конвенсияга қўшилиш мамлакатда медиация институтини ривожлантиришга, халқаро тижорий низоларни қисқа муддатда ва кам харажат билан ҳал этишга, тадбиркорларнинг ҳуқуқ ва қонуний манфаатларини ишончли ҳимоя қилишга хизмат қилади.
Муҳокамалар якунида қонун лойиҳаси депутатлар томонидан қабул қилинди.