Ўзбекистон ва Туркманистон ўртасида тўғридан-тўғри авиақатновларни тиклаш масаласи муҳокама қилинди
Ўзбекистон транспорт-логистика соҳаси вакиллари иштирокида Туркманистоннинг Ўзбекистондаги фавқулодда ва мухтор элчиси Шадурди Мередов билан учрашув бўлиб ўтди.
Ўзбекистон ва Туркманистон ўртасида тўғридан-тўғри авиақатновларни қайта тиклаш масаласи муҳокама марказида бўлди.
Музокаралар чоғида бир қатор муҳим масалалар, жумладан, ҳайдовчилар учун визаларни электрон шаклда расмийлаштириш ва тўловларни мақбуллаштириш, Фарап–Олот чегара ўтиш пунктидаги жараёнларни такомиллаштириш, шунингдек, навбатлар ва кутиш вақтини қисқартириш бўйича фикр алмашилди.
Бундан ташқари, тез бузиладиган юклар учун махсус йўлак яратиш, нейтрал ҳудудда иккинчи кўприк қуриш, Туркманбоши порти орқали автомобил ва темир йўл орқали юк ташишни тезлаштириш, вазн ва габарит чекловларини қайта кўриб чиқиш ҳамда Ўзбекистон ва Туркманистон ўртасида тўғридан-тўғри авиақатновларни тиклаш масалаларига алоҳида эътибор қаратилди.
Туркманистон томони билдирилган таклифларни кўриб чиқишга ва уларни тегишли давлат органларига етказишга тайёрлигини билдирди.