Ўзбекистон ва Қирғизистон транспорт вазирлари “Хитой–Қирғизистон–Ўзбекистон” темирйўли қурилиши билан танишади
Вазирлар Қирғизистон ҳудудида туннеллар, кўприклар ва бошқа инфратузилма объектларини қуриш масалаларини кўриб чиқиб, ишларни бажариш суръатлари ва келгусидаги вазифаларни муҳокама қилади.
Ўзбекистон ва Қирғизистон транспорт вазирлари “Хитой–Қирғизистон–Ўзбекистон” темирйўли қурилишини кўздан кечиради.
Жорий йилнинг 28–29-июл кунлари Ўзбекистон транспорт вазири Илҳом Маҳкамов ва Қирғизистон транспорт ва коммуникациялар вазири Талантбек Солтобоев Қирғизистон ҳудудида барпо этилаётган “Хитой–Қирғизистон–Ўзбекистон” темирйўлининг асосий иншоотларига бориб, қурилиш жараёни билан танишади.
“Кабар” ахборот агентлигининг хабар беришича, ташриф давомида томонлар Қирғизистон ҳудудида туннеллар, кўприклар ва бошқа инфратузилма объектларини қуриш масалаларини муҳокама қилиб, иш суръатлари ва келгуси вазифаларни белгилаб олади.
Вазирлар, шунингдек, қурилиш ишларининг ўз вақтида ва сифатли бажарилишини таъминлаш юзасидан фикр алмашади.
Агентликнинг таъкидлашича, “Хитой–Қирғизистон–Ўзбекистон” темирйўл лойиҳаси стратегик аҳамиятга эга бўлиб, уч давлат ўртасидаги транспорт алоқаларини мустаҳкамлаш, транзит имкониятларини кенгайтириш ва янги халқаро транспорт йўлагини яратишга қаратилган.