Ўзбекистон ва Ўмон преференсиал савдо тўғрисидаги битимни тайёрлашга келишди

Ўзбекистон ва Ўмон преференсиал савдо тўғрисидаги битимни тайёрлашга келишди

Ўзбекистон ва Ўмон преференсиал савдо ҳамда инвестицияларни ҳимоя қилиш бўйича битимларни тайёрлаш юзасидан келишувга эришди. Бу масала Ўзбекистон инвестициялар, саноат ва савдо вазири Лазиз Кудратовнинг 30-сентабр — 2-октабр кунлари Маскат шаҳрига қилган амалий ташрифи доирасида муҳокама қилинди.

Вазир Ўмон давлат тузилмалари ва компаниялари раҳбарлари билан учрашувлар ўтказди. Иқтисодиёт вазири Хамис бин Сайф ал-Жабрий ҳамда савдо, саноат ва инвестицияларни рағбатлантириш вазири Анвар бин Ҳилол ал-Жабрий билан бўлган музокараларда савдо ва инвестициялар, саноат кооперацияси, транспорт-логистика йўлаклари ҳамда икки томонлама кун тартибидаги бошқа масалалар кўриб чиқилди.

Томонлар, шунингдек, инвестицияларни ҳимоя қилиш ва преференсиал савдо бўйича битимларни тайёрлаш, транспорт йўлаклари ҳамда қўшма лойиҳалар юзасидан ҳам келишувларга эришган.

Бундай келишув айрим товар гуруҳларига божларни камайтириш ёки бекор қилишни назарда тутиши ва шу орқали ўзаро савдони соддалаштириши мумкин. Ҳозирча айнан қайси товарларга имтиёзлар берилиши маълум қилинмаган.

Ўмон ишбилармон доиралари билан мулоқотларда логистика, энергетика, нефт-газ кимёси, электротехника, тоғ-кон саноати, банк сектори ва туризм соҳаларидаги ҳамкорлик истиқболлари муҳокама қилинди.

Учрашувларда янги ишлаб чиқариш ва логистика қувватларини яратиш, экспорт йўналишларини кенгайтириш, энергияни сақлаш тизимлари ва маълумотлар марказларини ташкил этиш, хомашёни қайта ишлаш ҳамда тўғридан-тўғри етказиб бериш масалалари ҳам кўриб чиқилди.

Бундан ташқари, бизнес-форум, Ўзбекистон салоҳияти кўргазмаси ва йирик бизнес вакиллари билан учрашувлар ўтказиш масалалари ишлаб чиқилмоқда.

Эслатиб ўтамиз, август ойида Ўзбекистон Жанубий Африка Республикаси билан ҳам преференсиал савдо тўғрисидаги битим устида иш бошлашга келишиб олганди.