Ўзбекистон ва Жанубий Корея саноат-технологик алянс тузиши мумкин
Ўзбекистон ва Жанубий Корея саноат-технологик алянс тузиши мумкин
Шавкат Мирзиёев ҳамда Жанубий Корея бош вазири Ҳан Сонг Сук қўшма бизнес форумининг очилиш маросимида қатнашди. Бу ҳақда президент матбуот хизмати маълум қилди.
Тадбирда икки давлатнинг давлат тузилмалари ва ишбилармон доиралари вакилларидан 300 нафардан зиёд киши, жумладан, етакчи молия институтлари, йирик саноат корхоналари ва савдо компаниялари раҳбарлари иштирок этди.
Хусусан, Корея томонидан Лотте Чемисал, Ҳюндаи Мотор Гроуп, Самсунг С&Т, СЖ Гроуп, Шинҳан Финансиал Гроуп, Ҳюндаи Ротем, Кинд, Боми, Киа Сорпоратион, Сампё Гроуп, Ҳансае Мобилитй каби йирик компаниялар қатнашди.
Давлат раҳбари ўз нутқида Корея Ўзбекистоннинг вақт синовидан ўтган дўсти ва алоҳида стратегик шериги эканини, савдо-иқтисодий ҳамда инвестициявий ҳамкорлик эса Ўзбекистон – Корея кўп қиррали алоқаларининг устувор йўналишларидан бири эканини таъкидлади.
Етакчи корейс компанияларининг Ўзбекистонда самарали фаолият юритиб, мамлакат иқтисодиётини ривожлантиришга сезиларли ҳисса қўшаётгани алоҳида қайд этилди.
Бугун Ўзбекистон индустриал ва технологик тараққиётнинг янги босқичига чиқмоқда. Шу сабабли ўзаро савдо ҳажмини ошириш, инвестициявий ҳамкорликни кенгайтириш ва янги қўшма лойиҳаларни амалга ошириш учун кенг имкониятлар очилмоқда.
Мамлакат етакчиси Ўзбекистоннинг ресурс салоҳияти, Кореянинг илғор технологиялари ва икки мамлакат компанияларининг инвестициявий имкониятларини бирлаштириш орқали янги иқтисодий ўсиш нуқталарини яратишни таклиф этди.
Президент келгусида иқтисодий шерикликни ривожлантиришнинг асосий йўналишларини белгилаб берди.
Хусусан, саноат кооперацияси, энергетика ва “яшил иқтисодиёт”, транспорт ва замонавий инфратузилма, рақамлаштириш ҳамда сунъий интеллект соҳаларида ҳамкорликни ривожлантириш йўналишлари кўрсатиб ўтилди.
Шунингдек, яримўтказгичлар ва микроелектроника, биотехнология ва фармацевтика, қўшма илмий тадқиқотлар, илғор технологияларни жорий этиш ҳамда кадрлар тайёрлашга эътибор қаратилди.
Корея компаниялари мисни қайта ишлаш, электротехника ускуналари ишлаб чиқариш, автомобил ва электромобиллар учун бутловчи қисмларни маҳаллийлаштириш, робототехника ҳамда биотехнология соҳаларидаги лойиҳаларга таклиф этилди.
Шу билан бирга, гидроенергетика, энергияни сақлаш тизимлари, энергетика тармоқларини модернизация қилиш ҳамда транспорт ва шаҳар инфратузилмасини ривожлантириш бўйича ҳамкорлик қилиш таклиф қилинди.
Саноат-технологик ҳамкорликни чуқурлаштиришнинг амалий механизми сифатида Ўзбекистон – Корея саноат-технологик алянсини тузиш таклиф этилди.
Президент мамлакатда корейс бизнеси фаолияти учун келгусида қулай шарт-шароитлар яратиш ҳамда қўшма лойиҳаларни амалга оширишда амалий кўмак кўрсатишга тайёр эканини билдирди.