Ўзбекистон ва Чонг Кун Данг ҳамкорликни муҳокама қилди
Ўзбекистон делегацияси Кореяда Чонг Кун Данг билан фармацевтика, биосимилярлар, технологиялар трансфери ва қўшма лойиҳаларни муҳокама қилди.
Ўзбекистон делегацияси Корея Республикасига ташрифи чоғида Чонг Кун Данг Пҳармасеутисал Сорп. компанияси вакиллари билан учрашув ўтказди. Бу ҳақда Тиббиёт ва фармацевтика саноатини ривожлантириш агентлиги маълум қилди. Делегация таркибида мазкур агентлик ҳамда Миллий биофармацевтика илмий-тадқиқот институти вакиллари бор эди.
Музокаралар давомида томонлар Кореянинг фармацевтика соҳасидаги тажрибасини Ўзбекистонда татбиқ этиш ва биргаликда лойиҳалар амалга ошириш имкониятларини кўриб чиқдилар.
Чонг Кун Данг вакиллари ўз компаниясининг дори воситаларини ишлаб чиқариш ва янги препаратларни яратиш борасидаги тажрибасини тақдим этди. Хусусан, биологик препаратлар ва биосимилярларга алоҳида эътибор қаратилди.
Ўзбекистон делегацияси компаниянинг замонавий ишлаб чиқариш инфратузилмаси, ГМП талабларига мувофиқ сифат назорати тизими ва илмий-тадқиқот фаолияти билан танишди.
Музокараларнинг асосий йўналишларидан бири Кореянинг илғор амалиётларини Ўзбекистон фармацевтика саноатига жорий этиш бўлди. Шунингдек, томонлар биофармацевтика соҳаси учун юқори малакали мутахассислар тайёрлаш, икки мамлакат мутахассислари ўртасида билим ва тажриба алмашинувини ривожлантириш масалаларини муҳокама қилдилар.
Бундан ташқари, учрашув иштирокчилари биофармацевтика соҳасида қўшма илмий-тадқиқот ва ишлаб чиқариш лойиҳаларини амалга ошириш истиқболларини кўриб чиқдилар. Муҳокама қилинган йўналишлар қаторида технологиялар трансфери ҳамда ҳамкорликни янада ривожлантириш учун истиқболли соҳаларни белгилаш масалалари ҳам бўлди.