Ўзбекистон ва Баҳрайн тўғридан-тўғри авиақатновларни йўлга қўйишни муҳокама қилмоқда
Ўзбекистон ва Баҳрайн Тошкент ва Манама ўртасида тўғридан-тўғри авиақатновларни йўлга қўйиш имкониятини муҳокама қилмоқда. Томонлар туристик статистика алмашинувини фаоллаштириш, ўзаро инфо ва пресс-турларни ривожлантиришга ҳам келишиб олди. 2025-йилда Ўзбекистонга Баҳрайндан 551 нафар сайёҳ келган.
Ўзбекистон ва Баҳрайн тўғридан-тўғри авиақатновларни йўлга қўйиш масаласини муҳокама қилмоқда
Ўзбекистон ва Баҳрайн Тошкент ҳамда Манама шаҳарлари ўртасида бевосита авиақатновларни ташкил этиш имкониятини кўриб чиқди. Бу масала Ўзбекистон Туризм қўмитаси раиси Абдулазиз Аққуловнинг БААда Баҳрайн туризм вазири Фотима Ал-Сайрафий билан учрашувида муҳокама қилинган, дея хабар берди Туризм қўмитаси.
Томонлар, шунингдек, ўзаро сайёҳлар оқимини кўпайтириш ва икки давлат туризм соҳаси вакиллари ўртасидаги тўғридан-тўғри алоқаларни мустаҳкамлаш масалаларини ҳам кўриб чиқди.
Ўзбекистон ва Баҳрайн маркетинг тадқиқотлари натижалари, туристик статистика ҳамда бозордаги асосий тенденсиялар юзасидан мунтазам ахборот алмашишни йўлга қўйишга келишиб олди.
Бундан ташқари, туризм соҳаси ва оммавий ахборот воситалари вакиллари учун ўзаро инфо ва пресс-турларни давом эттириш режалаштирилмоқда.
Баҳрайн томони “Ипак йўлида туризм” Тошкент халқаро туризм ярмаркасида қатнашишга таклиф этилди. Ярмарка 25−27-ноябр кунлари бўлиб ўтади.
Миллий статистика қўмитаси маълумотларига кўра, Баҳрайндан Ўзбекистонга сайёҳлар оқими ортиб бормоқда. 2023-йилда мамлакатга туристик мақсадда 192 нафар, 2024-йилда — 291 нафар, 2025-йилда эса — 551 нафар Баҳрайн фуқароси ташриф буюрган. Икки йил ичида бу кўрсаткич қарийб уч бараварга ошган. 2025-йилда Баҳрайнга 9 нафар ўзбекистонлик сайёҳ борган.
Ўзбекистон 2025-йил июн ойидан Баҳрайн, Кувайт ва Ўмон фуқаролари учун 30 кунлик визасиз режим жорий этган.