Ўзбекистон ТИВ Украинани Мустақиллик куни билан табриклади

Ўзбекистон Ташқи ишлар вазирлиги Украинани Мустақиллик куни билан қутлади. Бу ҳақда вазирликнинг Х (илгари Твиттер номи билан танилган) ижтимоий тармоғидаги расмий саҳифасида эълон қилинди.

Табрик постида шундай дейилган: “Украинадаги барча дўстларимизни Мустақиллик куни билан самимий табриклаймиз!”

Украина 24-август куни ўз мустақиллигининг 35 йиллигини нишонламоқда. 1991-йилнинг айнан шу санасида Украина Олий радаси мамлакат мустақиллиги тўғрисидаги актни қабул қилган эди. Ушбу қарор ўша йилнинг 1-декабрида ўтказилган умумхалқ референдумида аҳолининг 90 фоиздан ортиғи томонидан қўллаб-қувватланган.

Ўзбекистон ва Украина ўртасида дипломатик алоқалар 1992-йилда ўрнатилган.

2022-йилда муносабатларнинг 30 йиллиги нишонланганида, Шавкат Мирзиёев Владимир Зеленскийга йўллаган табригида қуйидагиларни таъкидлаган эди: “Бу ойда биз икки томонлама муносабатларимиз тарихидаги муҳим сана – дипломатик муносабатлар ўрнатилганининг 30 йиллигини нишонлаймиз. Ҳеч шубҳа йўқки, анъанавий дўстлик ва ўзаро ҳурмат тамойилларига асосланган ўзбек-украин муносабатлари биргаликдаги саъй-ҳаракатларимиз туфайли бундан кейин ҳам ривожланиб боради”.

Россиянинг Украинага кенг кўламли босқини бошланганидан сўнг, 2022-йил март ойида ташқи ишлар вазири Абдулазиз Комилов Ўзбекистон Украинанинг мустақиллиги, суверенитети ва ҳудудий яхлитлигини тан олишини, бироқ Донецк ва Луганск республикаларини тан олмаслигини расман маълум қилган эди.