Ўзбекистон шоколад импортининг қарийб 70 фоизи Россияга тўғри келмоқда
7 ойда Ўзбекистон 46 давлатдан шоколад маҳсулотлари импорт қилди
Ўзбекистон шоколад импортининг қарийб 70 фоизи Россия ҳиссасига тўғри келмоқда
Миллий статистика қўмитаси маълумотларига кўра, 2026-йил январ–июл ойларида Ўзбекистонга 46 давлатдан қарийб 28,5 минг тонна шоколад маҳсулотлари олиб кирилган.
Импорт қилинган маҳсулотларнинг умумий қиймати 123,7 млн АҚШ долларини ташкил этган. Бу ўтган йилнинг мос даврига нисбатан 1,6 минг тоннага ёки 6 фоизга кўп.
Импорт ҳажми бўйича Россия яққол етакчилик қилган. Йилнинг дастлабки етти ойида Россиядан Ўзбекистонга 19,5 минг тонна шоколад маҳсулотлари етказиб берилган.
Россиядан келган шоколад маҳсулотлари умумий импортнинг қарийб 70 фоизини ташкил этган. Кейинги ўринда Украина турибди, ундан 2,2 минг тонна маҳсулот импорт қилинган.
Қозоғистондан 914 тонна, Беларусдан 805,2 тонна шоколад маҳсулотлари олиб кирилган. Литвадан импорт 746,2 тоннани ташкил этган.
Туркманистон 715,2 тонна, Туркия эса 569,5 тонна кўрсаткич билан кейинги ўринларда қайд этилган. Қолган давлатлар ҳиссасига 3 минг тонна маҳсулот тўғри келган.