Ўзбекистон олийгоҳларида Қозоғистон, Қирғизистон, Тожикистон ва Мўғулистон фуқароларига 70 та грант ажратилди

Ўзбекистон олий таълим муассасаларида Қозоғистон, Қирғизистон, Тожикистон ва Мўғулистон фуқаролари учун жами 70 та грант ажратилди.

Олий таълим, фан ва инновациялар вазирлиги маълумотларига кўра, 2026/27-ўқув йилида ушбу давлатлар фуқаролари учун грант ўринлари қуйидагича тақсимланган:

* Қозоғистон — 20 та;

* Қирғизистон — 20 та;

* Тожикистон — 20 та;

* Мўғулистон — 10 та.

Хусусан, қирғизистонлик абитуриентлар бакалавриатнинг қуйидаги йўналишларида ўқишлари мумкин:

* Мактабгача таълим — 4 та ўрин;

* Компютер инжиниринги — 4 та ўрин;

* Агрономия — 4 та ўрин;

* Сув хўжалиги ва мелиорация — 2 та ўрин;

* Экология ва атроф-муҳит муҳофазаси — 2 та ўрин;

* Қурилиш инжиниринги — 4 та ўрин.

“Кабар” нашрининг хабар беришича, ажратилган ўринларга номзодларни саралаш Ўш давлат университети томонидан амалга оширилади. Ўзбекистон олий ўқув юртларида таълим ўзбек ва рус тилларида олиб борилади. Ўзбек тилида ўқитиш лотин графикаси асосида бўлгани сабабли, номзодларнинг лотин алифбосини билиши ҳам ҳисобга олинади. Номзодлар танланган таълим тилини билишини намойиш этиши ва иккита мутахассислик фанидан синовдан ўтиши шарт. Имтиҳонлар беш баллик тизимда баҳоланади.

Ҳужжатлар 2026-йилнинг 22-августига қадар қабул қилинади. Кириш синовлари 24-август куни соат 08:00 да Ўш давлат университетининг бош ўқув биносида бўлиб ўтади. Танловда иштирок этиш учун анкета, умумий ўрта ёки ўрта махсус, касб-ҳунар таълими тўғрисидаги диплом ёки аттестат нусхаси, паспорт нусхаси, рус тилидаги белгиланган шаклдаги тиббий маълумотнома ва фотосурат тақдим этиш лозим.

Қирғизистон ёшларига Ўзбекистоннинг етакчи олий ўқув юртларида таълим олиш учун ҳар йили устувор йўналишлар бўйича грантлар ажратиш 2021-йилда бошланган эди.

Ўзбекистонда 2026/27-ўқув йили учун ОТМларга қабул квоталари июл ойида тасдиқланган бўлиб, энг муҳим янгиликлардан бири ахборот технологиялари ва сунъий интеллект йўналишлари учун давлат гранти квоталари 35 фоизга оширилгани бўлди.