Ўзбекистон компанияларига Сурияга экспортда омбор, сертификатлаштириш ва ташиш харажатлари субсидияланади
Ўзбекистон компанияларининг Сурияга экспорт қилишида омбор, сертификатлаштириш ва ташиш харажатлари субсидияланади
Ўзбекистон компанияларига Сурия бозорига киришда омбор ижараси, маҳсулотларни сертификатлаштириш ҳамда ташиш харажатларини субсидиялашни ўз ичига олган кўмак бериш режалаштирилмоқда. Бу ҳақда 19-сентябр куни Тошкентда бўлиб ўтган Ўзбекистон–Сурия бизнес-форумида маълум қилинди.
Форумда Ўзбекистон инвестициялар, саноат ва савдо вазири Лазиз Қудратов, Сурия иқтисодиёт ва саноат вазири Муҳаммад Нидал аш-Шаар, шунингдек, икки давлатнинг савдо-саноат бирлашмалари ҳамда бизнес вакиллари қатнашди. Сурия томонидан тўқимачилик, фармацевтика, озиқ-овқат ва кимё саноати, қишлоқ хўжалиги, қурилиш материаллари, электротехника каби йўналишларда фаолият юритувчи 30 дан ортиқ компания раҳбарлари иштирок этди.
Тадбиркорларнинг икки мамлакат бозорларига чиқишини қўллаб-қувватлаш доирасида Ўзбекистон компанияларининг экспорт жараёнидаги айрим харажатларини қоплаш механизмларини жорий этиш кўзда тутилган. Сурия бизнесига эса Ўзбекистонда фаолият юритиш учун маҳаллий ҳамкорларни топиш, музокаралар ташкил этиш ва лойиҳаларни амалга оширишда ёрдам бериш режалаштирилмоқда.
Форумда савдо ва инвестициявий ҳамкорликни кенгайтиришга қаратилган бошқа чоралар ҳам белгиланди. Хусусан, 2027-йил феврал ойида Ҳалаб ва Дамашқ шаҳарларида “Маде ин Узбекистан” кўргазмасини, шу йил давомида эса Тошкентда Сурия маҳсулотлари кўргазмасини ўтказиш режалаштирилмоқда. Ҳалабдаги Ўзбекистон савдо уйидан маҳаллий бозорда ўзбек маҳсулотларини тарғиб қилиш ва янги ҳамкорлар топишда фойдаланиш кўзда тутилган.
Тармоқлар кесимида ҳамкорликни тизимли ривожлантириш учун икки мамлакат вазир ўринбосарлари бощилигида ищи гуруҳ ҳам тузилган. Гуруҳ аниқ лойиҳалар, компаниялар ва амалий ечимлар устида ишлаши, асосий ташаббусларни ягона Йўл харитасига жамлаши режалаштирилмоқда.
Музокаралар давомида компаниялар ўртасида савдо ва инвестиция йўналишларида дастлабки келишувларга эришилгани қайд этилди. Форум доирасидаги Б2Б ва Б2Г учрашувларида эса аниқ маҳсулотлар, инвестиция лойиҳалари ва салоҳиятли ҳамкорларни аниқлаш масалалари муҳокама қилинди.
Август ойи ўрталарида Ўзбекистон электротехника маҳсулотлари илк бор Сурияга экспорт қилингани ҳақида хабар берилганди. Кондиционерлар, музлаткичлар ва кир ювиш машиналари ортилган икки юк машинаси Суриянинг Ҳалаб шаҳрига етказилган. Ушбу юкларнинг қиймати 90 минг долларни ташкил этган.