Ўзбекистон БМТнинг медиация бўйича конвенсиясига қўшилди
Ўзбекистон Бирлашган Миллатлар Ташкилотининг медиация натижасида эришилган халқаро келишув битимлари тўғрисидаги конвенсиясига қўшилди. Бу бўйича қонун 2026-йил 14-августда президент Шавкат Мирзиёев томонидан имзоланди.
Ўзбекистон БМТнинг медиация бўйича конвенсиясига аъзо бўлди.
ЎРҚ–1167-сонли қонунга асосан, Ўзбекистон Бирлашган Миллатлар Ташкилотининг медиация натижасида эришилган халқаро келишув битимлари тўғрисидаги конвенсиясига қўшилиши тасдиқланди. Ушбу конвенсия 2018-йил 20-декабрда Ню-Ёрк шаҳрида қабул қилинган эди.
Қонунга кўра, Ўзбекистон конвенсияга қўшилишда икки муҳим шартни белгилади:
1. Конвенсия қоидалари Ўзбекистон Республикаси ёки унинг ҳукумат муассасаси, шунингдек, ҳукумат муассасаси номидан иш юритувчи шахс иштирок этган келишув битимларига татбиқ этилмайди.
2. Ўзбекистон конвенсияни фақат келишув битимининг иштирокчилари уни қўллашга рози бўлган ҳолатларда татбиқ этади.
Мазкур қонун 2026-йил 4-августда Қонунчилик палатаси томонидан қабул қилиниб, 8-августда Сенат томонидан маъқулланган. Ҳужжат 14-август куни Президент томонидан имзоланган.