Ўзбекистон: аҳоли, уй-жой ва қишлоқ хўжалиги бўйича янги рақамлар
2026-йил 15-январ ҳолатига кўра, Ўзбекистоннинг доимий аҳолиси 39 миллион 47 минг 321 нафарни ташкил этган.
Ўзбекистоннинг демографик ва аграр манзарасига оид янги маълумотлар 2026-йилги аҳоли, уй-жой ва қишлоқ хўжалигини рўйхатга олишнинг дастлабки натижаларида ўз аксини топди. Мамлакат аҳолиси 39 миллиондан ошган, шаҳар аҳолиси қишлоқ аҳолисидан кўпайган, шунингдек, қишлоқ хўжалигида илгари расмий статистикада қайд этилмаган қарийб 1 миллион гектар ер аниқланган.
2026-йил 15-январ ҳолатига кўра, Ўзбекистоннинг доимий аҳолиси 39 047 321 нафарни ташкил этган. Шундан 21 276 729 нафари (54,5%) шаҳарларда, 17 770 592 нафари (45,5%) қишлоқларда истиқомат қилади.
Ҳудудлар кесимида Тошкент шаҳри аҳолиси тўлиқ шаҳар аҳолиси ҳисобланади. Шаҳар аҳолиси улуши Наманган вилоятида 66,2%, Навоий вилоятида 59,3%, Тошкент вилоятида 58,7%ни ташкил этган. Самарқанд вилоятида эса шаҳар аҳолиси улуши 39,9%, Хоразм вилоятида 38,1% бўлган.
Рўйхатга олишнинг дастлабки маълумотларига кўра, мамлакат аҳолисининг миллий таркиби қуйидагича:
* Ўзбеклар – 84,5%
* Тожиклар – 4,8%
* Қозоқлар – 2,4%
* Қорақалпоқлар – 2,2%
* Руслар – 1,8%
* Қирғизлар – 0,8%
* Татарлар – 0,4%
* Туркманлар – 0,3%
* Корейслар – 0,3%
* Украинлар – 0,1%
* Бошқа миллатлар – 2,4%
Тил хусусиятлари бўйича аҳолининг 91,3% ўзбек тилида, 2,3% қорақалпоқ тилида, 2,2% тожик тилида, 2% рус тилида, 1,4% қозоқ тилида сўзлашади.
Ҳудудлар кесимида аҳолининг медиан ёши энг паст кўрсаткич Фарғона вилоятида – 26,7 ёш бўлган. Кейинги ўринларда Навоий вилояти – 27 ёш ва Андижон вилояти – 27,1 ёш қайд этилган. Медиан ёш энг юқори ҳудудлар: Тошкент шаҳри – 30,9 ёш, Тошкент вилояти – 29,9 ёш, Бухоро вилояти – 29,5 ёш.
Рўйхат натижаларига кўра, мамлакат аҳолисининг 99,5% Ўзбекистонда туғилган. Хусусан, Тошкент шаҳрида яшовчи 3,225 миллион аҳолининг 81,5% пойтахтнинг ўзида туғилган. Қолган 18,5% Ўзбекистоннинг бошқа ҳудудлари ёки хорижда туғилган. Тошкент вилоятида эса 3,763 миллион аҳолининг 90,9% шу вилоятда, 9,1% бошқа ҳудудлар ёки хорижда туғилган.
Уй-жой шароитлари бўйича аҳолининг асосий қисми – 85,3% якка тартибдаги турар-жой уйларида истиқомат қилади. Кўп квартирали уйларда яшовчилар улуши – 12,4%, дала ҳовлиларда – 1%, бошқа турдаги турар-жойларда эса 1,4%ни ташкил этган. Кўп қаватли уйларда яшовчилар улуши энг юқори Тошкент шаҳрида – 51,3%. Навоий вилоятида бу кўрсаткич 25,4%, Тошкент вилоятида 18,7%ни ташкил этган.
Қишлоқ хўжалигида жами 1,03 миллион нафар ходим меҳнат қилади. Уларнинг 50,3% эркаклар, 49,7% аёллар. Энг эътиборли натижалардан бири – қишлоқ хўжалигида аввалги расмий статистик маълумотларда қайд этилмаган 985,4 минг гектар қўшимча ер ресурси аниқлангани бўлди.
Умуман, 2026-йилги рўйхатга олишнинг дастлабки натижалари Ўзбекистоннинг нафақат демографик ҳолати, балки уй-жой шароитлари, меҳнат ресурслари, ер ва сув захиралари ҳамда чорвачилик таркиби ҳақида ҳам анча батафсил тасаввур бермоқда.