Ўзбекистон 2027–2029-йилларда Қўшилмаслик ҳаракатига илк маротаба раислик қилади
Ўзбекистон 2027-йилдан 2029-йилгача Қўшилмаслик ҳаракатига биринчи марта раислик қилади.
Президент Шавкат Мирзиёевнинг таъкидлашича, Ўзбекистон халқаро дипломатиянинг муҳим марказига айланиши учун кўп қиррали, вазмин ва мувозанатли ташқи сиёсатни давом эттиради. Иқтисодий дипломатия ташқи сиёсатнинг устувор йўналишларидан бири бўлиб қолади.
Ўзбекистон 2027-2029-йилларда Қўшилмаслик ҳаракатига илк бор раислик қилади. Бу глобал тузилма 120 дан ортиқ давлатни бирлаштирган бўлиб, унинг самарадорлигини оширишга қаратилган ташаббуслар фаол илгари сурилади. Шунингдек, Афғонистон бўйича конструктив сиёсат қатъий давом эттирилади.
Президент тантанада иштирок этган дипломатик корпус вакиллари, хорижий оммавий ахборот воситалари ходимлари ҳамда АҚШ, Туркия ва Сингапурдан келган юқори мартабали меҳмонларга самарали ҳамкорлик учун миннатдорлик билдирди.
Давлат раҳбари глобал иқлим ўзгариши шароитида сув ва экология масалалари тобора долзарб бўлиб бораётганини ҳам таъкидлади. Келгуси беш йилда экин майдонларида сув тежайдиган технологиялар қамровини 100 фоизга етказиш режалаштирилган.