ОТМда бўш қолган ўринларга қабул 28-августгача давом этади
Ўзбекистонда олий таълим ташкилотларида тўлмай қолган вакант ўринлар учун абитуриентлардан аризалар қабул қилинмоқда. Кириш имтиҳонларида камида 56,7 балл тўплаб, талабаликка тавсия этилмаганлар, шунингдек, танлов босқичида ОТМ ва таълим йўналишини танламаган абитуриентлар танловда қатнашиши мумкин. Аризалар 28-августга қадар қабул қилинади.
ОТМлардаги бўш ўринларга қабул жараёни 28-августга қадар давом этади. Абитуриентларни қизиқтирган асосий саволларга жавоблар берилди.
Кириш имтиҳонларида иштирок этиб, 56,7 ва ундан юқори балл тўплаган, аммо ўқишга кира олмаган абитуриентлар бўш қолган ўринлар учун ҳужжат топширишлари мумкин. Шунингдек, қабулнинг танлов босқичида олий таълим муассасаси ва таълим йўналишини танламаган абитуриентларга ҳам вакант ўринлар учун ариза бериш имконияти тақдим этилади.
Абитуриент ўзининг фанлар мажмуасига мос таълим йўналишларида бўш ўринлар мавжуд бўлса, 5 тагача йўналиш ва олий таълим муассасасини танлаши мумкин. Бунда кундузги, кечки ёки масофавий таълим шаклларидан бирини танлаш имконияти мавжуд.
Вакант ўринлар учун ариза Билим ва малакаларни баҳолаш агентлигининг шахсий кабинети орқали топширилади. Абитуриент шахсий кабинетидаги "Вакант ўринлар учун ариза бериш" бўлими орқали танловда иштирок этиши мумкин.
Вакант ўринлар учун рўйхатдан ўтган абитуриентлар тўплаган баллари кетма-кетлигига қатъий риоя қилинган ҳолда сараланади. Танловдан муваффақиятли ўтганлар базавий тўлов-контракт асосида талабаликка тавсия этилади. Яъни, ушбу вакант ўринларга қабул давлат гранти асосида эмас.
Вакант ўринлар учун ариза бериш жараёни 22-августдан 28-августгача давом этади. Қабул якунланганидан сўнг бир ҳафта ичида танлов натижалари – мандат эълон қилиниши белгиланган.
Агар абитуриент танламоқчи бўлган йўналиш тизимда кўринмаса, бу йўналиш бўйича белгиланган қабул квотаси тўлган бўлиши мумкин. Қўшимча қабул барча таълим йўналишларига эмас, фақат қабул параметрлари тўлмай қолган вакант ўринларга амалга оширилади.