Отлар сони бўйича Ўзбекистон дунёда 30-ўринни эгаллаб турибди

Отлар сони бўйича Ўзбекистон дунёда 30-ўринни эгаллаб турибди

31 августдан 6 сентябргача Қирғизистонда бўлиб ўтган VI Бутунжаҳон кўчманчилар ўйинларидан сўнг отларга бўлган қизиқиш яна ортди. Спорт дастурига 40 дан ортиқ спорт тури ва йўналишлари кирди. Уларнинг салмоқли қисми отлар иштироки билан боғлиқ эди. Спортчилар кўкбўри ва кўкпар, от пойгаси, узоқ масофага от чопиш марафони ва эр-эниш, шунингдек, турли миллий кураш турлари бўйича беллашдилар.

Энг юқори натижаларга Қозоғистон ва Қирғизистон спортчилари эришдилар. Қозоғистон Туризм ва спорт вазирлиги маълумотларига кўра, қозоғистонликлар жориқ (узоқ масофага от пойгаси), тенге илу ва бошқа йўналишларда энг яхши натижаларни кўрсатдилар.

Мамлакатнинг бундай муваффақиятларга эришишига, жумладан, Қозоғистон ўз кўчманчи аждодлари анъаналари ва маданиятини ҳурмат қилиши ҳамда кўп йиллардан буён йилқичиликни ривожлантиришни қўллаб-қувватлаб келаётгани ёрдам берди.

Бир неча йилдан буён Қозоғистон отлар сони бўйича жаҳон рейтингида тўртинчи ўринни сақлаб келмоқда. БМТнинг Озиқ-овқат ва қишлоқ хўжалиги ташкилоти (FAO) маълумотларига кўра, 2024 йил якунлари бўйича ушбу ҳайвонлар энг кўп бўлган бешта давлат қаторига Мексика (6,4 млн бош), Бразилия (5,7 млн бош), Мўғулистон (4,7 млн бош), Қозоғистон (4,4 млн бош) ва Хитой (3,5 млн бош) кирди.

Халқаро ташкилот статистикасига кўра, Қозоғистон Республикаси Марказий Осиёда отлар сони бўйича яққол етакчи ҳисобланади. Бошқа мамлакатлар сезиларли даражада орқада қолмоқда.

Хусусан, Бутунжаҳон кўчманчилар ўйинларини ўтказиш ташаббускори бўлган Қирғизистон дунёда атиги 17-ўринни эгаллаб турибди. 2024 йилда Қирғизистонда отлар сони бор-йўғи 553,5 минг бошни ташкил этди. Ўзбекистон 30-ўринда (283 минг бош), Тожикистон эса 51-ўринда (92 минг бош) қайд этилди. Марказий Осиёдаги энг паст кўрсаткич Туркманистонда: 27,6 минг бош.

Чорвачиликнинг ушбу тармоғи ривожланишида қўшни давлатлар ўртасида бундай катта фарқ мавжудлигининг сабаблари талайгина. Объектив ва энг яққол сабаблардан бири — ҳудудий жиҳатдан катта фарқлардир. Қозоғистоннинг умумий майдони 2,7 млн кв. км дан ошади.

Қозоғистоннинг Марказий Осиёда отлар сонининг ўсиши бўйича етакчилигининг бошқа сабаблари қаторига чорвачиликнинг ушбу секторини мунтазам молиялаштириш киради. Бундай инвестициялар нафақат отлар сонини кўпайтириш, балки объектларни қуриш, реконструкция қилиш ва модернизация қилиш, шунингдек, техника, асбоб-ускуналар ва транспорт воситаларини сотиб олиш учун ҳам муҳимдир.

2020 йилда йилқичилик соҳасида асосий капиталга киритилган инвестициялар 3,5 млрд тенгени ташкил этган бўлса, икки йил ичида улар икки баравар кўпайди. Инвестициялар оқими кескин ошиб, 49 млрд тенгега етган 2023 йил энг юқори кўрсаткич қайд этилган давр бўлди.