Ота меҳмонхонадан йиқилиб тушган ўғлининг ўлимига сабабчи бўлганини тан олди
Пафос судида маълум қилинишича, икки ёшли бола июль ойида Кипрдаги меҳмонхона деразасидан тушиб кетган.
Ота меҳмонхонадан йиқилиб тушган ўғлининг ўлимига сабабчи бўлганини тан олди
Эркакка Кипрга суд жараёнига қайтиш шарти билан боласининг дафн маросими учун Буюк Британияга қайтишга рухсат берилган эди.
Британиялик эркак Кипрдаги меҳмонхона деразасидан йиқилиб тушган икки ёшли ўғлининг ўлимига сабабчи бўлганини тан олди.
Эссексдан бўлган ота сешанба куни Пафос судида эҳтиётсизлик, бепарволик ёки хавфли ҳаракат туфайли ўлимга сабаб бўлиш айблови бўйича ўз айбига иқрор бўлди.
Бола 12 июль куни Хлоракасдаги King Evelthon Beach Hotel and Resort меҳмонхонасининг тўртинчи қаватидан йиқилиб тушган, деб хабар берган эди аввалроқ Times нашри.
Навбатдаги суд мажлиси 5 октябрга белгиланган бўлиб, унда прокурор иш тафсилотларини баён қилади, ҳимоячи эса жазони енгиллаштирувчи ҳолатларни тақдим этади, деб тасдиқлади суд вакили.
Суд мажлисида судланувчининг исми ошкор қилинмади.
Бола 12 июль куни Хлоракасдаги King Evelthon Beach Hotel and Resort меҳмонхонасининг тўртинчи қаватидан йиқилиб тушган
Эркакка ўтган ҳафта Кипрга қайтиб келиш ва айбловни тан олиш бўйича суд мажлисида иштирок этиш шарти билан, фарзандининг дафн маросими учун Буюк Британияга қайтишга рухсат берилган эди.
Унинг адвокати Александрос Александру кейинги суд мажлисигача мижози рафиқаси ва қизининг ёнида бўлиши учун Буюк Британияга қайтишига имкон берувчи саёҳат чекловларини олиб ташлашни суддан сўрашини айтди.
Июль ойида Пафос туман судида маълум қилинишича, отаси болани белидан ушлаб, у ёқдан бу ёққа силкитаётган вақтда бола очиқ деразадан йиқилиб тушган.
Александрунинг айтишича, ота узоқ давом этадиган суд жараёнидан қочиш ва оиласини судда боланинг ўлимини қайта бошдан кечиришдан халос қилиш учун айбига иқрор бўлишни танлаган.
Адвокат сешанба кунги мажлисдан сўнг Associated Press агентлигига берган интервьюсида узоқ давом этадиган суд жараёни эркакнинг «яна ушбу фожиа қурбони» бўлишини англатишини айтди.
«У учун энг муҳими — оиласи бағрига қайтиш», деди у.
Ушбу жиноят учун максимал жазо тўрт йиллик қамоқ жазосини назарда тутади, бироқ Александру суд судланувчиларга жарима солинган ёки шартли жазо берилган аввалги ишларни ҳисобга олиши кераклигини айтди.