Ўртоқ Сааховнинг шляпаси, Жек Николсоннинг болтаси: ауксионда рекорд нархга сотилган машҳур филмлар реквизитлари
Ўртоқ Сааховнинг шляпаси, Жек Николсоннинг болтаси: машҳур филмлар реквизитлари ауксионда рекорд нархларда сотилди
Ҳар бир муваффақиятли филм ортида нафақат истеъдодли актёрлар ва даҳо режиссёрлар, балки суратга олиш майдончасидаги реквизитлар ҳам муҳим ўрин тутади. Қуйида машҳур кинофилмлардан олинган ва катта маблағга сотилган буюмлар билан танишинг.
Ўртоқ Сааховнинг шляпаси кимошди савдосидаги машҳурлик онини 37 йил кутди
Кўпчилик севиб томоша қиладиган “Кавказ асираси” комедиясидаги машҳур “Шляпани еч!” ибораси ёдингиздами? Владимир Этуш маҳорат билан ижро этган ўртоқ Сааховнинг ёрқин образига хос бўлган бу бош кийим кино экранидан ташқарида ҳам машҳур бўлди.
2003-йил декабр ойида Москвада нафақага чиққан актёрлар фойдасига хайрия кимошди савдоси ўтказилади. Бу тадбирда мазкур шляпа энг қимматбаҳо лотлардан бирига айланади. Владимир Этуш 1966-йилда суратга олинган филмнинг бу реквизитидан ажралишни истамаган, аммо охир-оқибат уни сотувга қўйишга қарор қилади. Шляпанинг бошланғич нархи атиги 50 доллар эди, бироқ савдо жараёнида унинг нархи 3600 долларгача кўтарилади.
Мерилин Монронинг оқ кўйлаги: ўзгаришлар шамоли эсганда
“Еттинчи йил иситмаси” филмидаги Мерилин Монронинг афсонавий оқ кўйлаги нафақат Голливуд жозибадорлигининг, балки рекорд даражадаги ауксион савдоларининг рамзига айланди. 2011-йилда бу машҳур либос ақлбовар қилмас 4,6 миллион долларга сотилади.
Қизиғи, Мерилиннинг эри, бейсболчи Жо ДиМажио бу кўйлакни ёмон кўрар ва ўша саҳнадан ғоят ғазабланган эди. Суратга олишдан уч ҳафта ўтгач, газеталар уларнинг ажрашгани ҳақида хабар тарқатади.
“Титаник”дан олинган эшик: Жекни қутқаролмаган ёғоч панел
“Титаник” филмидаги машҳур ёғоч панел ниҳоят янги эгасини топди. 2024-йилнинг март ойида ушбу машҳур реквизит Ҳеритаге Аустионс кимошди савдосида 718 750 АҚШ долларига сотилди.
Савдо 60 000 доллардан бошланди, аммо атиги олти дақиқада нарх 700 000 долларга чиқди. Ҳамма “эшик” деб атайдиган бу панел, аслида кема салонидаги эшик ромининг бир қисми экан. У 1912-йилда чўкиб кетган “Титаник”нинг ҳақиқий парчаси асосида балза ёғочидан ясалган.
“Ёғду”даги болта: мухлислар тунги даҳшатли тушлар учун бутун мол-мулкини беришга тайёр
“Ёғду”даги энг қўрқинчли саҳна — Жек Николсоннинг эшикни бузиб кириб, “Мана, Жонни ҳам келди!” деб қичқириши бўлса керак. Стенли Кубрикнинг машҳур филмидаги ўша болта 2019-йилги кимошди савдосида 209 минг долларга сотилди.
“Келажакка қайтиб” филмидаги ДеЛореан: ярим миллион долларлик вақт машинаси
Юқорига қаноцимон очиладиган эшиклари ва зангламайдиган пўлат корпуси билан машҳур бўлган ДеЛореан ДМС-12 автомобили 2011-йил декабр ойидаги кимошди савдосининг чинакам юлдузига айланди. Марти МакФлай ва доктор Эммет Браун саёҳат қилган бу автомобил 541 200 долларга сотилди.
Ушбу нусха трилогия учун яратилган еттита ДеЛореанъдан бири бўлиб, уларнинг фақат учтаси суратга олиш жараёнидан омон қолган. Сотилган автомобил франшизанинг учинчи қисмида, Марти 1885-йилда Докни қидириш учун сафарга чиққан саҳнада ишлатилган. Суратга олиш ишлари якунлангач, машина 14 йил давомида Универсал Студиос ҳовлисида қолиб кетади ва кейинчалик Лос-Анжелесдаги Петерсон музейида қисқа муддат намойиш этилади.
Сотувдан тушган маблағнинг бир қисми Майкл Ж. Фокснинг Паркинсон касаллигини ўрганиш жамғармасига йўналтирилади — Марти ролини ижро этган актёр 1991-йилдан бери ушбу дардга чалинган.
Одри Ҳепберннинг кичкина қора кўйлаги: миллион долларлик нафосат тимсоли
“Тиффанидаги нонушта” филмидаги Одри Ҳепберннинг машҳур қора либоси 2006-йил декабрда Чристиеъс кимошди савдосида рекорд даражадаги 467 200 фунт стерлингга (тахминан 923 187 доллар) сотилди. Ҳеч ким бундай шов-шувни кутмаганди — дастлабки баҳо атиги 50-70 минг фунт стерлингни ташкил этганди.
1961-йилда афсонавий Юбер де Живанши томонидан яратилган енгсиз нафис кўйлак нозик дид рамзи сифатида тан олинди. Филмнинг машҳур бошланиш саҳнасида Холли Голайтли (Ҳепберн) эрта тонгда қўлида қаҳва ва круассан билан таксидан тушиб, бўм-бўш Бешинчи шоҳ кўчасига чиқади ва заргарлик дўкони витринасига мафтун бўлиб тикилиб қолади.
Кимошди савдоси ортидаги таъсирли воқеа шуки, Живанши модалар уйи Калкуттадаги камбағал болаларга ёрдам берувчи Ситй оф Жой Аид хайрия ташкилоти учун маблағ йиғиш мақсадида ушбу кўйлакни совға қилган.
Доротининг ёқут туфлилари: сеҳрли воқеа, ўғрилик ва рекорд нарх
“Оз мамлакати сеҳргари” филмидаги Доротининг ялтироқ ёқут туфлилари кимошди савдоси дунёсида ҳақиқий шов-шувга сабаб бўлди. 2024-йил декабр ойида ушбу машҳур поябзалнинг сақланиб қолган тўрт жуфтидан бири ақлбовар қилмас 28 миллион АҚШ долларига сотилди.
Бу туфлининг тарихи алоҳида филмга арзигуликдир. 1939-йилда 16 ёшли Жуди Гарланд учун яратилган туфлининг ҳар бири 2300 та ялтироқ мунчоқ билан қўлда безатилган. Қизиғи шундаки, китобда туфли кумушрангда тасвирланган, аммо филмда улар ёқут рангида кўрсатилган. Бунинг сабаби янги Течнисолор рангли форматида сариқ ғиштли йўл фонида янада чиройли кўриниш бериш эди.
2005-йилда мазкур туфли Миннесотадаги Жуди Гарленд музейидан ўғирланган ва 13 йилдан кейин 2018-йилда ФҚБ томонидан топилган. Ажабланарлиси, ўғри уларни ҳақиқий ёқутлар билан безатилган деб ўйлаган.
Ҳеритаге ауксион уйи туфлиларнинг нархи тахминан 3 миллион доллар атрофида бўлишини тахмин қилганди, аммо 15 дақиқалик қизғин савдодан сўнг, Доротини уйга олиб борган сеҳрли туфлилар кино реквизитлари орасида мутлақ рекорд ўрнатди.