Оригинал атирни қалбакисидан фарқлашга ёрдам берадиган олтита лайфҳак

Асл атирни қалбакисидан фарқлашга ёрдам берадиган олтита маслаҳат

Парфюмерия харид қилаётганда, унинг юқори сифатли ва хушбўй ҳиди узоқ вақт сақланиб қолишини истаймиз, аммо баъзида нотўғри танлов бу умидларни пучга чиқариши мумкин.

**Қадоқни синчиклаб кўздан кечиринг**

Биринчи навбатда қадоқни диққат билан текшириш лозим. Сохта парфюмерия ишлаб чиқарувчилар ҳуқуқий муаммолардан қочиш учун шрифтни, дизайнни ёки атир номидаги бир ёки иккита ҳарфни бироз ўзгартириши мумкин.

**Флаконга эътибор беринг**

Сохта атирни флакон дизайни орқали осонгина аниқлаш мумкин. Фаббон порталининг ёзишича, масалан, сохта атир ишлаб чиқарувчилар ном, логотип ва бошқа маълумотларни ёзишда кўпинча паст сифатли бўёқлардан фойдаланади, уларни тирнаб осонгина ўчириш мумкин. Ҳақиқий атирларнинг флакони эса бутунлай силлиқ ва юқори сифатли бўлади.

**Қути ичидаги картон**

Парфюмерия ишлаб чиқарувчилар қадоқлаш сифатига ҳам кўп маблағ сарфлашни истамагани сабабли, қути ичидаги картон конструксияси ҳам фарқ қилади. Оригинал атир қутисида флакон қадалиб қолмаслиги учун “оригами” услубида яратилган силлиқ оқ рангдаги картонни топишингиз мумкин.

**Штрих-код ва серия рақами**

Оригинал атирларда серия рақами ва штрих-код ҳам қадоқнинг ўзида, ҳам флаконида бўлади. Бундан ташқари, бу маълумот флаконга ёки нозик шаффоф стикерга ёзилиши мумкин.

**Қопқоқ**

Флакон қопқоғи ҳам сохта маҳсулотларни аниқлашда муҳим рол ўйнайди. Оригинал атирнинг қопқоғи юқори сифатли, чидамли ва флаконга маҳкам ўрнашган бўлади. Сохта парфюмерия эса одатдагидан анча енгил ва жуда заиф қопқоққа эга бўлиши мумкин.

**Атирнинг ҳиди ва унинг қанча сақланиб қолишига эътибор беринг**

Атирни дўкондан олишдан олдин уни яхшилаб текширинг. Сохта атирнинг ҳиди оригиналга ўхшаш бўлса-да, у юқори, ўрта ва асосий ноталар орқали очилмайди. Сохта атир ишлаб чиқарувчилар қиммат хомашёга пул сарфламагани сабабли, бу атирларнинг ҳиди ўхшаш бўлади ва узоқ вақт сақланиб қолмайди. Агар флаконнинг пастки қисмида ғалати чўкма ёки қандайдир суспензия бўлса, уни сотиб олмаган маъқул. Оригинал атирни текширишнинг яна бир усули — флаконни силкитиш. Силкитганда сохта атирлардаги пуфакчалар бир зумда, оригиналида эса кўпроқ вақтдан кейин йўқолади.