“Ўргимчак одам” филми юлдузи Эндрю Гарфилд кинони бутунлай тарк этишини маълум қилди

"Ўргимчак одам" филмининг машҳур актёри Эндрю Гарфилд кино фаолиятини бутунлай якунлаш ниятида эканлигини эълон қилди.

Америкалик таниқли актёр Эндрю Гарфилд Вариетй нашрига берган интервюсида ишдан ниҳоятда чарчаганини ва кино оламини бутунлай тарк этиш ҳақида ўйлаётганини маълум қилди.

Актёрнинг сўзларига кўра, сўнгги пайтларда унинг иш жадвали жуда тиғиз бўлган ва у деярли дам олмаган.

"Бу йил жуда кўп ишладим. Лойиҳалар кетма-кет келгани сабабли бир йилга яқин вақтим сёмка майдончаларида ўтди. Албатта, одамлар бу меҳнатларимни кўришини хоҳлайман, шу сабабли журналистлар билан гаплашишга тўғри келяпти. Буни тушунаман. Аммо ихтиёрим ўзимда бўлганида, ҳамма нарсани ташлаб, Сомерсет графлигининг бир чеккасига кўчиб ўтган бўлардим. У ерда тинчгина ёғоч йўниб, қушларни томоша қилиб яшардим", дейди Гарфилд.

Актёр илгари фақат "Ўргимчак одам" ролини ўйнашни орзу қилганини, бироқ ҳозир ҳаётга бўлган қарашлари ўзгарганини таъкидлади. У энди асосий эътиборини оиласи, яқин дўстлари ва ўзининг руҳий хотиржамлигига қаратмоқчи.