Ўргимчак ҳам, баландлик ҳам эмас: кино юлдузларининг ғайриоддий фобиялари

Ўргимчак ҳам эмас, баландлик ҳам эмас: кино юлдузларининг ноодатий фобиялари

Биз актёрларни доим экранда, қизил йўлакларда ва турли тадбирларда кўрсак-да, улар ҳам худди биз каби оддий инсонлар эканини унутмаслик керак. Бу эса уларнинг қалбида ҳам турли қўрқувлар борлигини англатади. Айрим қўрқувлар болаликдан қолган бўлса, бошқалари машҳурликка эришгач пайдо бўлган. Ҳатто катта гонорарлар, нуфузли мукофотлар ва кўплаб мухлислар ҳам уларни бу хавотирлардан халос эта олмайди. Баъзан бу қўрқувлар ҳақиқатан ҳам ғайриоддий кўриниш олади.

Машҳур “Ёмон Санта” актёри энг ғалати қўрқувлардан бири — антиквар мебеллардан қўрқишдан азият чекади (бу ҳолат эпиплафобия деб ҳам аталади). Билли Боб Торнтоннинг айтишича, 1950-йилларгача ясалган эски стул, стол ёки жавонларни кўрса, кўнгли айнийди ва нафаси бўғилади.

Айниқса, Людовик ХИВ даврига оид франсуз антиқа буюмлари уни даҳшатга солади. Унинг “Бандидлар” филмидаги қаҳрамони ҳам худди шу ҳолатни бошдан кечиради. Айни пайтда, пластмасса ёки металлдан ясалган замонавий мебеллар унда бундай салбий туйғуларни уйғотмайди.

Никол Кидманда лепидоптерофобия — тангачақанотлилардан қўрқиш ҳолати бор. Бу қўрқув уни ёшлигидан бери таъқиб қилиб келади. Австралиялик актриса ҳар сафар мактабдан қайтаётганда уйининг дарвозасида катта капалакларни кўрар эди. Уларга дуч келмаслик учун у девордан ошиб ўтар ёки айланма йўлдан юрарди.

Муҳими, актриса қўрқувини енгишга уриниб кўрган. Бир куни у Америка табиат тарихи музейидаги капалаклар қафасига кирган. Бироқ бу ёрдам бермаган — актриса ҳануз ҳашаротларнинг тасодифий тегиб кетишига ҳам чидай олмайди. Аммо у илон ёки ўргимчаклардан мутлақо қўрқмайди.

Скарлетт Ёханссон орнитофобиядан, яъни қушлардан қўрқишдан азият чекади. Актрисанинг ўзи айтганидек, қушларнинг деярли ҳамма нарсаси уни қўрқитади: тумшуғи ҳам, қанотлари ҳам, қанот қоқиши ҳам.

Бутун дунёдаги миллионлаб томошабинларни қўрқувга солган саспенс устаси... Хўш, Алфред Ҳичкок нимадан қўрқиши мумкин? Жавоб сизни ҳайратга солади: товуқ тухумидан. Бу овофобия деб аталади. Режиссёр умрида ҳеч қачон тухум татиб кўрмаганини, ҳатто бошқаларнинг уни ейишига ҳам қарай олмаслигини айтган.

Уни тухумнинг кўриниши ҳам қўрқитган, у буни жирканч ва ваҳимали деб ҳисоблаган. Айтганча, буюк ижодкор полициячилардан ҳам қўрққан. Отаси профилактика учун танишидан кичкина Алфредни 5 дақиқага камерага қамаб қўйишни сўраган экан.

Этни жунжиктирадиган кўплаб образларни яратган актёр болалигидан масхарабозлардан қўрқади. Жонни Деппга ҳар доим қувноқ чеҳра ниқоби остида қандайдир ёвуз нарса яширингандек туюлган, шу сабабли уни “У” ёки “Жокер” филмларида кўришимиз амримаҳол.

Шунга қарамай, у “аччиқни аччиқ кесар” усулини синаб кўрмоқчи бўлган: уйининг деворларига масхарабозлар суратини осган ва ҳатто уларнинг ҳайкалчаларини ҳам тўплаган. Шундай бўлса-да, “Кариб денгизи қароқчилари” юлдузи ҳозиргача жонли масхарабозни кўрганда ўзини жуда ноқулай ҳис қилишини тан олади.

Классик китобдан кўра электрон китобни афзал кўрадиганлар орасида Меган Фокс, шубҳасиз, биринчи бўлади. Чунки у анча кам учрайдиган папирофобиядан азият чекади — бундай одамлар қуруқ қоғозга тегинишга тоқат қилолмайди. Шу сабабли ссенарийларни ўқиш унинг учун катта қийинчилик туғдиради. Агар қўл остида бир стакан сув бўлмаса, у мутолаага киришмайди. Саҳифаларни бемалол очиш учун бармоқларини доим сувга ботириб туради, акс ҳолда уни асабий титроқ босади.

“Трансформерлар” юлдузини доскага бўр билан ёзилганда чиқадиган овозга тоқат қилолмайдиганлар яхши тушунса керак, актриса бу ҳиссни айнан шунга қиёслайди. Шу сабабли у рақамли нусхалар билан ишлашни маъқул кўради. Шунингдек, унда кўпчиликда учрайдиган қоронғиликдан қўрқиш ҳисси ҳам бор, шунинг учун ёлғиз қолса, ҳануз уйдаги чироқларни ўчирмайди.