“Ўқувчилар билимини илмий йўналишда қўллашда ҳали камчилигимиз бор”. Вазир — ПИСА 2025 натижалари ҳақида

“Ўқувчилар билимини илмий йўналишда қўллашда ҳали камчилигимиз бор”. Вазир — ПИСА 2025 натижалари ҳақида

ПИСА 2025 натижалари Ўзбекистон ўқувчиларининг кўрсаткичлари қувонарли эканини, шу билан бирга таълим тизимида ҳали ҳал этилиши керак бўлган масалалар борлигини ҳам кўрсатди.

Эъзозхон Каримованинг айтишича, ПИСА тадқиқотида ўқувчиларнинг табиий фанлар бўйича билими, мактабларда улар учун яратилган таълим шароитлари ва яна бир қатор жиҳатлар ўрганилган. Натижалар Ўзбекистоннинг Марказий Осиё давлатлари орасида юқори ўринни эгаллаганини кўрсатган.

Вазир натижалардан келиб чиқиб, кейинги босқичда эътибор қаратилиши лозим бўлган йўналишларни ҳам санаб ўтди. Унинг қайд этишича, эндиликда ўқувчилар олган билимларини илмий йўналишда қўллай олишига кўпроқ эътибор берилади. У буни таълим тизими олдидаги асосий вазифалардан бири сифатида баҳолади.

“Болаларимиз билимни оляпти, лекин уни илмий йўналишда қўллашда ҳали камчилигимиз бор экан”, — дейди Каримова.

Унинг сўзларига кўра, таълим тизимидаги яна бир муҳим вазифа — мактаб ва ота-оналар ўртасидаги ҳамкорликни кучайтириш. ПИСА тадқиқотида ўқитувчиларнинг билим бериши билан бирга, оиланинг фарзанд таълимига кўрсатаётган кўмаги ҳам таҳлил қилинган.

“Ўқитувчиларимизнинг болаларга сидқидилдан билим ўргатишга ҳаракат қилаётганини ўқувчиларнинг ўзлари ҳам тасдиқлашган. Бироқ, ота-оналарнинг фарзанди таълимидаги иштироки масаласига ҳам жиддийроқ эътибор қаратишимиз лозим”, — дейди вазир.

“Бизда шундай тенденсия шаклланган: ота-она „фарзандимнинг билим олиши учун ҳамма шароитни қилиб қўйдим, бўлди“, деб ўйлайди. Қолган барча нарсани — билим олишни, ҳатто тарбияни ҳам таълим ташкилотларидан кутаётган ҳолатлар кўп кузатиляпти”, — дея қўшимча қилди Каримова.

Вазирнинг таъкидлашича, ота-она фарзандининг мактабда нимани ўрганаётгани билан уйда ҳам қизиқиши керак.

“Фарзанд мактабдан келганда: „Қани, бугун нимани ўргандинг, нимани тушундинг?“, деб сўрашнинг ўзи болада масъулият ҳиссини оширади. Устоз бу ёқдан сўрайди, ота-она у ёқдан сўрайди”, — дейди у.

Каримова таълимга киритилган инвестициялар ҳам ПИСА натижаларида ўз самарасини кўрсата бошлаганини қайд этди. Унинг сўзларига кўра, 2022-йилда таълим соҳасига йўналтирилган инвестициялар натижаси ҳозир кўрина бошлаган.

“Мен хурсанд бўлган жиҳат — таълимга киритилган инвестиция аста-секин натижасини кўрсата бошлади. Бу ҳурматли президентимиз томонидан болаларимизнинг етарли билим олишига қаратилган эътибор ва яратилган имкониятлар натижаси, деб ўйлайман”, — дейди вазир.

ПИСА 2025 тадқиқоти доирасида ўқувчиларнинг рақамли дунёда маълумот ва билим олиш даражаси, шунингдек, сунъий интеллектдан фойдаланиш билан боғлиқ кўникмалари ҳам ўрганилган.

Эъзозхон Каримованинг айтишича, энди ўқувчиларга сунъий интеллектдан фойдали мақсадларда ва тўғри фойдаланишни ўргатиш таълим тизими олдидаги муҳим вазифалардан бири бўлади.

Унинг сўзларига кўра, бу йўналишда амалий ишлар ҳам бошланган. Хитой Шарқий педагогика университети томонидан сунъий интеллект бўйича тайёрланган қўлланмалар Ўзбекистонга олиб келиниб, маҳаллийлаштирилган ва ўзбек тилига таржима қилинган.

“Ҳозир улар чоп этиляпти ва сентабр охирига қадар барча мактабларимизга етказилади”, — дейди у.

Вазирнинг таъкидлашича, мазкур қўлланмалардан фойдаланиш натижаси кейинги ПИСА тадқиқотларида намоён бўлиши мумкин.

Шунингдек, Каримова Ўзбекистон халқаро таълим тадқиқотларида иштирокини давом эттираётгани, мамлакатнинг ПИСА 2029 тадқиқотида иштирок этиши бўйича ҳам келишувга эришилганини қайд этди.

“Таълим ҳеч қачон тўхтамайди”, — дейди Мактабгача ва мактаб таълими вазири.

Эслатиб ўтамиз, ПИСА 2025'да Ўзбекистон ўқувчилари 91 та давлат ва таълим тизими орасида табиий фанлар бўйича 438 балл билан 48-ўринни, “Рақамли дунёда ўрганиш” йўналишида эса 402,4 балл билан 72-ўринни эгаллаган эди.

Математика ва ўқиш натижалари эса маълумотлардаги номутаносибликлар сабаб ҳозирча эълон қилинмади.