Онкомарказ Тошкент аҳолиси учун бепул хизматлар бекор қилингани ҳақидаги хабарларни рад этди
Республика ихтисослаштирилган онкология ва радиология илмий-амалий тиббиёт марказида Тошкент шаҳридан бўлган беморларга бепул хизмат кўрсатиш тўхтатилгани ҳақидаги маълумотлар рад этилди. Муассасада бепул ёрдам кўрсатиш тартиби эмас, балки беморларни йўналтириш маршрути ўзгарганини тушунтиришди. Эндиликда пойтахт аҳолиси, худди бошқа ҳудудлардаги беморлар каби, марказга DMED электрон тизими орқали йўналтирилади. Бемор аввал оилавий поликлиникага мурожаат қилади, у ерда […]
Онкомарказ Тошкент аҳолиси учун бепул хизматлар бекор қилингани ҳақидаги хабарларни рад этди
Республика ихтисослаштирилган онкология ва радиология илмий-амалий тиббиёт маркази Тошкент шаҳридан бўлган беморларга бепул хизмат кўрсатиш тўхтатилгани ҳақидаги маълумотларни рад этди.
Муассасанинг аниқлик киритишича, бепул ёрдам кўрсатиш тартиби эмас, балки беморларни йўналтириш схемаси ўзгарган. Эндиликда пойтахт аҳолиси ҳам, бошқа ҳудудлардаги беморлар каби, марказга DMED электрон тизими орқали йўналтирилади.
Аввал бемор оилавий поликлиникага мурожаат қилади ва у ерда зарур бирламчи текширувлардан бепул ўтади. Туман ёки шаҳар онкологи кўригидан ва қўшимча текширувлардан сўнг DMED тизимида электрон йўлланма расмийлаштирилади.
У онкомарказда тасдиқланганидан кейин беморга зарур хизматлар, жумладан, контрактли текширувлар, КТ/МРТ, ПЭТ-КТ, гистология, иммуногистохимия, шунингдек, кимётерапия, нур терапияси ва жарроҳлик амалиёти бепул кўрсатилади.
Марказда таъкидланишича, электрон йўлланмаларга ўтиш муассасага тушадиган юкламани камайтириш ва бирламчи текширувларнинг қайта ўтказилишига йўл қўймаслик зарурати билан боғлиқ. Бундан ташқари, бу Давлат тиббий суғуртаси жамғармаси маблағларини тўғридан-тўғри юқори технологияли тиббий ёрдамга йўналтириш имконини беради.
Йўлланма билан келган беморлардан ташхис қўйиш, даволаш, дори-дармонлар ва сарфлаш материаллари учун тўлов талаб қилиш тақиқланади. Йўлланмасиз режали мурожаат қилиш пуллик асосда амалга оширилади. Шошилинч тиббий ёрдам бепул ва йўлланмасиз кўрсатилади.
Агар йўлланма бўла туриб, онкомарказда пул ёки дори-дармон сотиб олиш талаб қилинса, муассаса 1303 ишонч телефонига мурожаат қилишга чақирди.