Омскдаги ёнғин оқибатида икки ўзбекистонлик жабрланди
Дастлабки расмий хабарларда қурилаётган кўп қаватли бинода ёнғин чиқиши оқибатида жабрланган 11 кишининг барчаси Ўзбекистон фуқаролари экани айтилганди. Ўзбекистон ТИВ бу маълумотни рад этди.
Омскда содир бўлган ёнғинда икки нафар Ўзбекистон фуқароси жабрланди
Россиянинг Омск шаҳрида 15-август куни қурилаётган бинода юз берган ёнғин натижасида 11 киши жароҳатланиб, касалхонага ётқизилди.
Дастлаб Россия Федерацияси Тергов қўмитасининг Омск вилояти бўйича бошқармаси жабрланганларнинг барчаси Ўзбекистон фуқаролари эканлигини маълум қилган эди. Бироқ, Ўзбекистон Ташқи ишлар вазирлиги матбуот котиби Омонулла Файзиев Kun.uzъга берган изоҳида бу маълумотни инкор этиб, жабрланганлардан фақат икки нафари Ўзбекистон фуқароси эканлигини тасдиқлади.
Жабрланганларнинг барчаси кўп қаватли бино қурилишида ишлаётган қурувчилар бўлган.
Маҳаллий манбаларнинг хабар беришича, ёнғинга пайвандлаш ишлари вақтида учқуннинг иситгичга тушиши сабаб бўлган. Воқеа жойига етиб келган Фавқулодда вазиятлар вазирлиги ўт ўчирувчилари 1000 квадрат метр майдонни қамраб олган ёнғинни ўчириш учун бир соатдан ортиқ вақт сарфлашган. Улар 5 кишини қутқариб, турли даражадаги тан жароҳатлари олган 11 кишини маҳаллий шифохонага олиб боришган.
Кейинчалик улардан уч нафари шифохонадан чиқарилган, қолган саккиз нафари эса оғир аҳволда жонлантириш бўлимида қолмоқда. Уларда тананинг 20 фоиздан 90 фоизигача куйиш ҳолатлари қайд этилган.