Омбудсманга мурожаат қилинганидан сўнг, маҳкумнинг тузалиш йўлига ўтганлиги тўғрисидаги хулоса қайта кўриб чиқилди

Адвокатнинг Омбудсманга қилган мурожаатидан сўнг, маҳкум К.Б.нинг тузалиш йўлига ўтмагани тўғрисидаги хулоса қайта кўриб чиқилди. Ушбу хулосани тайёрлашда етказилган зарарнинг қопланган қисми ва илгари эълон қилинган рағбатлантиришлар ҳисобга олинмагани аниқланди.

К.Б. 13-сонли колонияда жазо ўтаётган эди. Унинг адвокати маҳкум моддий зарарнинг сезиларли қисмини қоплагани, интизомий жазолари йўқлиги ва рағбатлантиришлар олганини маълум қилди.

Омбудсман аппарати ходимлари хулосани ўрганиб чиқиб, зарар миқдори ва қопланган сумма тўғрисидаги маълумотларда номувофиқликларни аниқладилар. Бундан ташқари, маҳкумга илгари эълон қилинган рағбатлантиришлар ҳам ҳисобга олинмаган.

Шундан сўнг, Омбудсман ИИВ ҳузуридаги Жазони ижро этиш департаментига тақдимнома киритди. Ушбу фактлар бўйича хизмат текшируви ўтказилиб, унинг якунларига кўра масъул ходимларнинг интизомий жавобгарлиги масаласини кўриб чиқишга қарор қилинди.

Сўнгра К.Б.нинг ҳолати комиссия томонидан унинг барча аъзолари иштирокида қайта кўриб чиқилди. Натижада унга тузалиш йўлига ўтганлиги тўғрисида хулоса берилди.

Кейинроқ материаллар суд томонидан кўриб чиқилди. К.Б.нинг озодликдан маҳрум қилиш жазосининг қолган муддати Жиноят кодексининг 74-моддасига мувофиқ бошқа, енгилроқ жазо билан алмаштирилди.

Шундан сўнг маҳкум жазони ижро этиш муассасасидан озод қилинди.