Олтита араб мамлакати ФИФА президентини қўллаб-қувватлашини маълум қилди

Олтита араб давлати ФИФА президенти Жанни Инфантинони қўллаб-қувватлашини эълон қилди.

2022-йилги Жаҳон чемпионати мезбони Қатар ва 2030-йилги Жаҳон чемпионатига номзод Марокашни ўз ичига олган олтита араб миллий футбол ассоциацияси раҳбарлари ФИФА президенти Жанни Инфантинога ўз ёрдамларини билдиришди.

Келгуси йили қайта сайланишга умид қилаётган Инфантино ҳозирда учта йирик конфедерация – УЕФА (Европа), ОФК (Осиё) ва КОНКАКАФ (Шимолий ва Марказий Америка) томонидан қаршиликка учрамоқда. Ушбу ташкилотлар ФИФА мусобақаларига, хусусан, Жаҳон чемпионатига хусусий инвестицияларни жалб қилиш бўйича бекор қилинган режаси ортидан унинг исте'фосини талаб қилиб чиққан эди.

Асосий келишмовчилик швейсариялик функсионернинг Жаҳон чемпионатининг тижорат ҳуқуқларини ажратиб, унинг 20 фоизини хусусий инвесторларга сотиш ва бу орқали тахминан 4,2 миллиард доллар ишлаб топиш таклифи билан боғлиқ. Агар ушбу лойиҳа амалга ошганида, аъзо ассоциациялар навбатдаги молиялаштириш даври учун 20 миллион доллардан маблағ олиши, келишув тўлиқ имзоланганда эса бу сумма икки бараварга ошиши кўзда тутилган эди. Бироқ эътирозлар сабабли бу таклиф қайтариб олинди.

Бундай босимлар фонида Қатар, Ливан, Марокаш, Судан, Миср ва Мавритания миллий федерациялари раҳбарлари (уларнинг тўрт нафари ФИФА Кенгаши аъзоси ҳисобланади) қўшма баёнот билан чиқишди:

“Араб футболининг инсонларни бирлаштириш ҳамда араб дунёсидаги футбол ассоциациялари ўртасидаги ҳамкорликни мустаҳкамлашдаги муҳим ролини эътироф этган ҳолда, биз ФИФА президенти жаноб Жанни Инфантинони тўлиқ қўллаб-қувватлашимизни билдирамиз. Шунингдек, биз унинг етакчилик салоҳиятига ҳамда жаҳон футболини ривожлантириш йўлидаги меҳнатларини қадрлаймиз.

Биз жаноб Инфантинонинг футболни глобал миқёсда ривожлантириш, барча ҳудудларда имкониятларни кенгайтириш ҳамда ўйиннинг жамиятларни бирлаштиришдаги ролини кучайтириш бо'йича олиб бораётган ишларини юксак қадрлаймиз. Жаҳон футболи учун янада кучли ва фаровон келажак сари у билан яқин ҳамкорликни давом эттиришдан умидвормиз”, дейилади расмий баёнотда.

Маълумот учун, 2026-йилнинг март ойида бўлиб ўтадиган ФИФА президентлиги сайловида овоз бериш ҳуқуқига эга бўлган 211 аъзодан 136 тасини айнан Европа, Осиё ҳамда Шимолий ва Марказий Америка конфедерациялари ташкил этади.