Олтин нархининг кўтарилиши НКМКнинг ярим йиллик соф фойдасини 2,4 млрд долларга етказди
Навоий кон-металлургия комбинати 2026-йилнинг биринчи ярмида 2,38 млрд доллар соф фойда олди. Бу – 2025-йилнинг шу даврига нисбатан 57,2 фоиз кўп. Компания олтин ишлаб чиқаришни оширмаган – аксинча, ишлаб чиқариш 1,8 фоизга камайган; фойданинг кескин ўсиши эса олтин нархининг кўтарилиши билан боғлиқ. Айни пайтда 1 унсия олтин ишлаб чиқариш харажати 41,5 фоизга қимматлаган.
Олтин нархининг ошиши НКМКнинг ярим йиллик соф фойдасини 2,4 млрд долларга олиб чиқди
Навоий кон-металлургия комбинати 2026-йил январ–июн ойларида 1,51 млн трой унсия олтин ишлаб чиқарди. Бу кўрсаткич бир йил аввалги 1,54 млн трой унсиядан сал паст.
Ишлаб чиқариш бироз камайганига қарамай, олтин нархларининг кўтарилиши ҳисобига компаниянинг ярим йиллик соф фойдаси ўтган йилнинг шу даврига нисбатан 57,2 фоизга ошиб, 2,38 млрд долларга етди.
Қайд этилишича, ҳисобот даврида соф тушум 49,9 фоизга кўпайиб, 7,067 млрд долларни ташкил этган. Операцион фойда эса йиллик ҳисобда 60,5 фоизга ошиб, 4,511 млрд долларга чиққан.
Мослаштирилган ЭБИТДА (фоизлар, солиқлар, амортизация ва эскириш харажатлари ҳисобга олинмасидан олдинги фойда) 4,889 млрд доллар бўлиб, бир йил ичида 59,8 фоизга ўсган. ЭБИТДА маржаси 64,9 фоиздан 69,2 фоизгача кўтарилган.
### Олтин қазиб олиш қимматлашди
Шу билан бирга, НКМКда бир унсия олтиннинг ишлаб чиқариш ва қўллаб-қувватлаш бўйича умумий харажати (АИСС) сезиларли даражада ошган.
2026-йилнинг биринчи ярим йиллигида АИСС 1 647 долларни ташкил этган. 2025-йилнинг шу даврида бу кўрсаткич 1 164 доллар эди. Яъни харажатлар 41,5 фоизга ошган.
Компания бунга, жумладан, олтин нархининг юқорилаши ортидан роялти тўловларининг кўпайиши, инфляция сабаб материаллар қимматлашиши ҳамда “Мурунтов” конини ривожлантириш лойиҳаси доирасидаги харажатларнинг ортиши билан изоҳ берган. Бундан ташқари, сўмнинг долларга нисбатан мустаҳкамланиши АИСС кўрсаткичининг бир унсия ҳисобида яна 101 долларга ошишига олиб келган.
### НКМК инвестицияларни ҳам оширди
Ҳисобот даврида компаниянинг инвестицион фаолиятга йўналтирган соф маблағлари 543 млн долларни ташкил қилган. Бу ўтган йилнинг мос даврига нисбатан 31,8 фоизга кўп. Маблағлар амалдаги конларда ишлаб чиқариш қувватларини кенгайтириш, тоғ-кон техникалари паркини кенгайтириш ва янги ресурсларни аниқлашга қаратилган геология-қидирув лойиҳаларига йўналтирилган.
Компаниянинг қарз юкламаси эса камайган: соф қарзнинг мослаштирилган ЭБИТДАга нисбати 0,5х дан 0,3х гача тушган. 30-июн ҳолатига НКМК қарз портфелида 2025-йил майида Лондон фонд биржасида жойлаштирилган 500 млн долларлик ва 2024-йил октабрида чиқарилган 1 млрд долларлик халқаро облигациялар мавжуд бўлган.