Олийгоҳлар битирувчиларининг иши ва маошига қараб баҳоланади
Ўзбекистонда олий таълим ташкилотлари учун «Битирувчи сифати индекси» жорий этилди. Унда битирувчиларнинг иш билан таъминлангани, барқарор бандлиги ва ўртача ойлик даромади ҳисобга олинади. Юқори натижа кўрсатган ҳар бир ОТМга 500 млн сўмгача рағбат маблағи ажратилиши мумкин.
Олийгоҳлар битирувчиларнинг иши ва маошига қараб баҳоланади
Вазирлар Маҳкамасининг 2026-йил 29-сентабрдаги 525-сон қарорига мувофиқ, олий таълим ташкилотлари битирувчиларининг меҳнат бозоридаги натижалари асосида баҳоланиши белгиланган.
Индексни шакллантиришда битирувчиларнинг бандлик даражаси, барқарор иш билан таъминлангани, ўртача ойлик даромади ҳамда бошқа тегишли кўрсаткичлар ҳисобга олинади.
Олийгоҳлар уч гуруҳга ажратилади
Индекс натижаларига кўра, олий таълим ташкилотлари қуйидагича таснифланади:
«Яшил» гуруҳ
- энг юқори натижа кўрсатган 30 фоиз ОТМ;
«Сариқ» гуруҳ
- кейинги 30 фоиз ОТМ;
«Қизил» гуруҳ
- қолган 40 фоиз ОТМ.
Бу фоизлар битирувчиларнинг бандлик кўрсаткичини эмас, баҳолаш якунида ҳар бир гуруҳга киритиладиган олийгоҳлар улушини билдиради.
Юқори натижа учун молиявий рағбат берилади
Индекс бўйича юқори кўрсаткичларга эришган олий таълим ташкилотларини молиявий рағбатлантириш ҳам назарда тутилган.
Бунда ҳар бир ОТМга 500 млн сўмгача маблағ ажратилиши мумкин.
Натижалар ҳар йили эълон қилинади
«Битирувчи сифати индекси» махсус автоматлаштирилган рақамли платформада шакллантирилади. Унинг натижалари ҳар йили 1-октабрга қадар эълон қилиб борилади.
Янги баҳолашда олийгоҳ битирувчиларининг диплом олгандан кейин меҳнат бозорида қандай натижага эришаётганига эътибор қаратилади.