Оилавий боғча очган тадбиркорларга солиқ имтиёзлари ваъда қилиняпти
Ўзбекистонда оилавий нодавлат мактабгача таълим ташкилотини очган якка тартибдаги тадбиркорларга солиқ имтиёзлари бериш кўзда тутилмоқда
Оилавий боғча очган тадбиркорларга солиқ имтиёзлари берилиши кутилмоқда.
Президент Шавкат Мирзиёевнинг тадбиркорлар билан ВИ очиқ мулоқотида белгиланган вазифаларни амалга оширишга қаратилган ПФ–175-сон фармонда тадбиркорларга қўшимча солиқ имтиёзлари бериш бўйича қонун лойиҳасини ишлаб чиқиш назарда тутилган.
Фармонга илова қилинган қонунчилик ҳужжатлари лойиҳалари рўйхатига кўра, оилавий нодавлат мактабгача таълим ташкилотини очган якка тартибдаги тадбиркорларни солиқдан қўшимча қўллаб-қувватлаш таклиф этилмоқда.
Хусусан, бундай тадбиркорлар оилавий боғча фаолиятида фойдаланадиган ва ўзларига тегишли бўлган бино ҳамда ер участкалари бўйича мол-мулк солиғи ва ер солиғидан озод этилиши назарда тутилган.
Шу билан бирга, бу норма ҳозирча тўғридан-тўғри жорий этилган имтиёз эмас. Фармон асосида «Тадбиркорларга солиқ имтиёзлари тақдим этиш орқали қўшимча қўллаб-қувватлашга доир чора-тадбирлар тўғрисида»ги қонун лойиҳаси ишлаб чиқилиши керак.
Демак, тегишли қонун қабул қилингач, оилавий боғча очган якка тартибдаги тадбиркорларнинг боғча учун фойдаланаётган ўз биноси ва ерига нисбатан мазкур солиқ имтиёзлари амал қилиши мумкин.