Одам савдосида айбланиб узоқ вақтдан буён қидирувда бўлган ўзбекистонлик аёл Туркияда ушланди
Одам савдосида айбланиб, халқаро қидирувда бўлган 43 ёшли Ўзбекистон фуқароси Истанбулда қўлга олинди. Аёл ёш қизларни юқори маошли иш ваъдаси билан Туркияга олиб келиб, паспортларини тортиб олиш орқали эксплуатация қилганликда гумонланмоқда. Айбланувчи Ўзбекистонга олиб келинди.
Одам савдоси жиноятини содир этишда айбланиб, узоқ вақт давомида халқаро қидирувда бўлган ўзбекистонлик аёл Туркияда қўлга олинди.
Ўзбекистон фуқароси бўлган, 1981-йилда туғилган N.Ye. икки мамлакат ҳуқуқни муҳофаза қилувчи органлари ҳамкорлигида Истанбул шаҳрида ўтказилган тезкор-қидирув тадбирлари чоғида ушланган.
Гумонланувчи Жиноят кодексининг 135-моддаси 3-қисми (Одам савдоси) билан айбланмоқда. У ёш қизларни юқори маошли иш ваъдалари билан алдаб Туркияга олиб келиш, уларнинг паспортларини олиб қўйган ҳолда фоҳишаликка мажбурлаш ва эксплуатация қилишда гумон қилинмоқда, дейилади хабарда.
Ушланган шахс белгиланган тартибда Ўзбекистоннинг ваколатли органларига топширилган. Айни пайтда унга нисбатан тегишли тергов ва процессуал ҳаракатлар давом эттирилмоқда.