ОАВ: Шаҳзода Ҳарри оиласи билан Буюк Британияга қайтмоқчи
Буюк Британия қироли Карл ИИИнинг кичик ўғли шаҳзода Ҳарри рафиқаси Меган Маркл ва фарзандлари билан АҚШдан Буюк Британияга қайтишни режалаштирмоқда. Британия ОАВга кўра, оила Лондон ташқарисидаги хусусий уйда яшаши, Арчи ва Лилибет эса сентябрдан Британиядаги мактабга қатнай бошлаши мумкин.
ОАВ хабарларига кўра, шаҳзода Ҳарри оиласи билан Буюк Британияга қайтишни режалаштирмоқда.
Тҳе Даилй Телеграпҳ ва Тҳе Сун нашрларининг 19-августдаги маълумотларига кўра, шаҳзода Ҳарри ва Меган Маркл Калифорнияга кўчиб кетганларидан олти йил ўтиб, Буюк Британияга қайтишга тайёргарлик кўрмоқда. Бу хабарни ББС ва Пресс Ассосиатион ҳам тарқатган. Бироқ, ҳозирча Ҳарри ва Меган, шунингдек, Британия қироллик оиласи бу режаларни расман тасдиқламаган. Шу сабабли, уларнинг АҚШдан бутунлай кўчиб келиши ёки Буюк Британияда фақат бир неча ой ёхуд йил яшаши номаълумлигича қолмоқда.
ОАВ маълумотларига кўра, қироллик оиласи ҳам Ҳаррининг қайтиш режаси ҳақида яқиндагина хабардор қилинган. Қирол Карл ИИИ бу ҳақда 16-август куни билган. Манбаларнинг таъкидлашича, монарх кичик ўғлининг оиласи қайтишидан ва набиралари – 7 ёшли Арчи ҳамда 5 ёшли Лилибет билан тез-тез кўришиш имконияти пайдо бўлишидан мамнун.
Шаҳзода Ҳарри ва америкалик актриса Меган Маркл 2018-йил баҳорида турмуш қурган. 2020-йил бошида эса улар қироллик оиласининг юқори мартабали аъзолари сифатидаги вазифаларидан воз кечиб, кейинчалик АҚШга кўчиб кетган эди. Бу жараён Британия матбуотида “Мегзит” номи билан машҳур бўлган.
Калифорнияга кўчиб ўтганидан кейин Ҳарри ва Меган қироллик оиласи ҳақида бир қатор кескин баёнотлар берган. Хусусан, Меган Ҳаррининг қариндошларини ирқчиликда айблаган. ОАВда 2022-йилда вафот этган қиролича Елизавета ИИ ҳам набираси ва унинг рафиқасининг қироллик вазифаларидан воз кечишини оғир қабул қилгани ҳақида хабарлар тарқалган эди.
Сўнгги вақтларда эса Ҳарри ва қироллик оиласи ўртасидаги муносабатлар юмшай бошлагани айтилмоқда. 2025-йилда шаҳзода оиласи билан ярашиш истагини билдирган. Ўша йил сентябрда Буюк Британияга ташрифи чоғида у Лондонда отаси Карл ИИИ билан учрашган.
2026-йил июлида эса қирол Карл ИИИ кўп йиллик танаффусдан сўнг кичик ўғлининг оиласи билан Англиянинг Глостершир графлигидаги Хайгроув қароргоҳида учрашган. Арчи ва Лилибет бобоси билан бунга қадар охирги марта 2022-йилда кўришган эди. Матбуот маълумотларига кўра, Хайгроувдаги учрашувда қиролича Камилла ҳам иштирок этган.
Шу тариқа, агар Британия ОАВда тарқалган маълумотлар тасдиқланса, Ҳарри ва Меганнинг қайтиши 2020-йилги “Мегзит”дан кейин қироллик оиласи билан муносабатлардаги энг муҳим ўзгаришлардан бири бўлиши мумкин. Ҳозирча Букингем саройи ҳам, Ҳарри ва Меган вакиллари ҳам бу хабарларга расмий муносабат билдирмаган.