ОАВ: АҚШ Қуруқлик қўшинлари вазири истеъфога чиқмоқда
АҚШ Қуруқлик қўшинлари вазири Дениел Дрисколл Пентагон раҳбари Пит Ҳегсет билан бир неча ой давом этган келишмовчиликлардан сўнг президент Доналд Трампга истеъфо аризасини топширди. НБС Невс манбаларига кўра, Оқ уй унинг истеъфосини қабул қилган.
ОАВ хабарларига кўра, АҚШ Қуруқлик қўшинлари вазири Дениел Дрисколл истеъфога чиқмоқда. Бу ҳақда дастлаб Тҳе Валл Стреет Жоурнал манбаларига таяниб хабар берилган, кейинчалик Реутерс ва АП ҳам ушбу маълумотни тасдиқлаган.
НБС Невс манбаларининг хабар беришича, Оқ уй Дрисколлнинг истеъфосини қабул қилган. Тҳе Валл Стреет Жоурнал маълумотларига кўра, у яқин кунларда Пентагонни тарк этиши кутилмоқда.
Дрисколлнинг истеъфога чиқишига мудофаа вазири Пит Ҳегсет билан АҚШ Қуролли кучларини ривожлантириш йўналиши ва бир қатор юқори мартабали офицерларни лавозимдан озод этиш масалаларида бир неча ойлик келишмовчиликлар сабаб бўлган.
Оқ уй матбуот котибининг биринчи ўринбосари Анна Келлининг таъкидлашича, Дрисколл АҚШ Қуруқлик қўшинлари вазирлигида Доналд Трамп маъмурияти дастурини амалга оширишда самарали ишлаган. У ҳарбий тайёргарлик ва қуролларнинг жанговар самарадорлигига устувор аҳамият берган, шунингдек, Россия ва Украина ўртасидаги музокараларга кўмаклашган.
Дрисколлнинг истеъфога чиқиши мумкинлиги ҳақидаги хабарлар аввалроқ ҳам тарқалган эди. Тҳе Валл Стреет Жоурнал 21-август куни у Пит Ҳегсет билан келишмовчиликлар туфайли йил охирига қадар лавозимини тарк этишни режалаштираётгани ҳақида ёзган эди.
Реутерснинг баҳолашича, Дрисколлнинг кетиши Доналд Трампнинг иккинчи президентлик муддати даврида Пентагон раҳбариятининг турли бўғинларида амалга оширилаётган кадрлар алмашинувининг навбатдаги босқичи бўлиши мумкин. Жорий йил апрел ойида АҚШ Қуруқлик қўшинлари штаби бошлиғи Ренди Жорж ва бир қатор бошқа юқори мартабали ҳарбий амалдорлар лавозимидан озод этилган эди.
Дениел Дрисколл АҚШ вице-президенти Жей Ди Венснинг дўсти ва собиқ курсдоши ҳисобланади. У 2025-йил ноябрида Кит Келлог ўрнига Доналд Трампнинг Украина бўйича махсус вакили этиб тайинланган.
Дрисколл АҚШ Қуруқлик қўшинлари вазири лавозимини 2025-йил феврал ойидан буён эгаллаб келаётган эди. Реутерс қайд этишича, у бу лавозимда армияни қуроллантиришда "мослашувчан ёндашув" тарафдори бўлиб, нисбатан арзон қурол-яроғ харид қилишни қўллаб-қувватлаган ва йирик қурол ишлаб чиқарувчиларни танқид қилиб келган.