ЎзЛиДеП ва Тожикистон Халқ-демократик партияси ҳамкорларга айланди
Ўзбекистон Либерал-демократик партияси (ЎзЛиДеП) ва Тожикистон Халқ-демократик партияси (ТХДП) ҳамкорлик тўғрисидаги меморандумни имзоладилар. Имзолаш маросими 5 сентябрь куни Тошкентда ТХДП раисининг биринчи ўринбосари Маликшо Неъматзода бошчилигидаги Тожикистон делегацияси билан учрашув чоғида бўлиб ўтди.
Ҳужжатга кўра, томонлар доимий партиялараро мулоқотни йўлга қўйиш, қонунчилик соҳасида тажриба алмашиш, шунингдек, икки мамлакат депутатлари ва маҳаллий ҳокимият органлари вакиллари ўртасидаги алоқаларни ривожлантириш ниятида. Келишув доирасида тадбиркорликни қўллаб-қувватлаш, инновацияларни ривожлантириш ҳамда ёшлар ва хотин-қизлар ташкилотлари ўртасидаги алоқаларни мустаҳкамлаш бўйича қўшма ташаббусларни йўлга қўйиш режалаштирилган. Ушбу вазифаларни бажариш учун қўшма ишчи гуруҳлар тузиш, шунингдек, мунтазам равишда форумлар, маслаҳатлашувлар ва мавзули учрашувлар ўтказиш кўзда тутилган.
Партиялар вакиллари партиялараро ҳамкорлик 2025 йилнинг мартида кучга кирган Иттифоқчилик муносабатлари тўғрисидаги шартномага, шунингдек, икки давлат раҳбарлари Шавкат Мирзиёев ва Эмомали Раҳмоннинг стратегик шерикликни чуқурлаштириш бўйича келишувларига асосланишини таъкидладилар.