ЎзДЖТУда Европа тиллари кунига бағишланган халқаро тадбир бўлиб ўтди

ЎзДЖТУда Европа тиллари кунига бағишланган халқаро тадбир бўлиб ўтди

2026 йил 30 сентябрь куни Ўзбекистон давлат жаҳон тиллари университетида Европа Иттифоқининг Ўзбекистондаги Делегацияси ва Британия Кенгаши иштирокида Европа тиллари кунига бағишланган халқаро тадбир бўлиб ўтди.

Учрашувда Европа давлатлари дипломатик миссиялари, халқаро ташкилотлар ва маданий марказлар вакиллари, шунингдек, университет профессор-ўқитувчилари ва талабалари жам бўлишди.

Очилиш маросимида Ўзбекистон давлат жаҳон тиллари университети ректори Илхомжон Тўхтасинов ва Европа Иттифоқининг Ўзбекистондаги Делегацияси раҳбари, элчи Тойво Клаар сўзга чиқдилар. Иштирокчиларга университет, унинг таълим йўналишлари ва халқаро алоқалари ҳақидаги видеопрезентация намойиш этилди. Очилишдан сўнг меҳмонлар ва иштирокчиларнинг умумий сурати олинди.

Сўнгра дастур Европа Иттифоқи мамлакатлари тиллари ва маданиятига бағишланган мавзуий тақдимотлар билан давом этди. Дипломатик ваколатхоналар, халқаро ташкилотлар ва маданий марказлар вакиллари тилларнинг ўзига хос хусусиятлари, кундалик иборалар, миллий анъаналар ва таълим имкониятлари ҳақида сўзлаб бердилар.

Университет фойесида «Тиллар ва маданиятлар ярмаркаси» кўргазмаси ташкил этилди. Стендларда Европа мамлакатлари ҳақидаги ахборот ва кўргазма материаллари: маданият ва таълим муассасалари тўғрисидаги маълумотлар жойлаштирилди.

Тўрт йилдан буён француз тилидан дарс бериб келаётган Француз альянси ўқитувчиси Мариза ўз таассуротлари билан ўртоқлашди.

Маризанинг сўзларига кўра, Ўзбекистонда француз тилига бўлган қизиқиш ҳамон юқорилигича қолмоқда. Уни ҳам талабалар, ҳам катталар ўрганмоқда, уларнинг кўпчилиги халқаро имтиҳонларни муваффақиятли топширмоқда.

«Француз альянсида ишлаётганимдан жуда хурсандман, чунки талаб ҳақиқатан ҳам катта. Ўзбекистонда француз тилини ўрганаётган талабалар, шунингдек, имтиҳонларни муваффақиятли топширган инсонлар жуда кўп. Биз бундан фахрланамиз», — деди ўқитувчи.

Маризанинг ўзи бир нечта тилни — француз, инглиз, рус ва ўзбек тилларини эркин билади. У тил билиш кундалик ҳаётда ва мулоқотда сезиларли даражада ёрдам беришини таъкидлади.

Унинг учун ушбу тадбирда иштирок этиш университетга илк ташрифи ҳамда талабалар ва ҳамкасблар билан танишиш имконияти бўлди.

Чет тилини самарали ўрганиш ҳақида гапирганда, Мариза учта асосий шартни тилга олди: аниқ мақсад, реал муддатлар ва мунтазамлик.

«Биринчи навбатда мақсад бўлиши керак — ўқиш, эмиграция, иш ёки карьера ўсиши учун. Кейин реал муддатларни белгилаш муҳим. Ва, албатта, мунтазамлик зарур. Мен буни француз тилини ўрганиш йўлидаги учта асосий қадам деб атаган бўлардим», — дея тушунтирди ўқитувчи.

Ўзбекистон давлат жаҳон тиллари университетининг биринчи курс талабаси Ҳамрақулова Зарнигор ҳам ўз таассуротлари билан ўртоқлашди.

У тадбирда иштирок этиш унга тилнинг маданиятнинг бир қисми ва одамларни бирлаштирувчи восита сифатидаги аҳамиятини чуқурроқ англашга ёрдам берганини таъкидлади.

«Бугун бу ерда кўплаб давлатлар вакиллари йиғилди. Тил шунчаки мулоқот воситаси эмас, балки одамларни бирлаштирадиган, уларни ўтмиш билан боғлайдиган ва маданиятни акс эттирадиган восита эканлиги ҳақидаги фикр мени руҳлантирди. Меҳмонларимизни кўришдан ва ушбу воқеада иштирок этишдан жуда хурсанд бўлдим», — деди талаба.

Тадбир университетнинг халқаро алоқаларини ривожлантиришга, кўптиллилик ва маданиятлараро мулоқотни қўллаб-қувватлашга хизмат қилди. Талабалар Европа давлатлари вакиллари билан мулоқот қилиш, уларнинг тиллари ва маданиятлари ҳақида кўпроқ билиб олиш, шунингдек, таълим имкониятлари ва халқаро ташаббуслар билан танишиш имкониятига эга бўлдилар.