«Ўзбекнефтгаз» ва Хитойнинг CNPC компанияси ёнилғи етказиб бериш ҳамда М-25 кондаги аварияни бартараф этишни муҳокама қилди

«Ўзбекнефтгаз» ва Хитойнинг CNPC компанияси ёқилғи етказиб бериш ва М-25 кондаги аварияни бартараф этишни муҳокама қилди

«Ўзбекнефтгаз» бошқаруви раиси Абдуғани Сангинов 20 октябрь куни Бош директор Чжоу Синьхуай бошчилигидаги Хитой Миллий нефть ва газ корпорацияси (CNPC) делегацияси билан музокаралар ўтказди.

Учрашувда томонлар геология-қидирув, бурғилаш, сейсмик тадқиқотлар, газ қазиб олиш самарадорлигини ошириш, рақамлаштириш ва замонавий ускуналар етказиб бериш соҳаларида ҳамкорликни кенгайтириш ҳақида сўз юритдилар.

Ушбу йўналишларда «Ўзбекнефтгаз» CNPC таркибига кирувчи Xibu, BGP, CCDC ва CNLC компаниялари билан ҳамкорлик қилмоқда.

Ўзбекистон компанияси маълумотларига кўра, CNPC билан ҳамкорликнинг умумий ҳажми, импорт шартномалари, сервис хизматлари ва қўшма лойиҳаларни ўз ичига олган ҳолда, 1 миллиард доллардан ошди. Шу билан бирга, йўналишлар бўйича тақсимот, ушбу сумма шаклланган давр ва ҳақиқатда ўзлаштирилган маблағлар ҳажмига аниқлик киритилмаган.

Музокараларнинг асосий мавзуларидан бири Сурхондарё вилоятининг Бойсун туманидаги «Мустақилликнинг 25 йиллиги» (М-25) газ конидаги авария оқибатларини бартараф этиш бўлди.

Лойиҳа доирасида махсус қутқарув қудуқларини бурғилаш режалаштирилган бўлиб, улар ёрдамида мутахассислар газни назоратсиз чиқиб кетишини тўхтатишни мўлжалламоқда.

Июнь ойида Абдуғани Сангинов авария оқибатларини бартараф этишга CNPC таркибига кирувчи Хитойнинг CCDC компанияси жалб этилганини маълум қилган эди. Унинг сўзларига кўра, хитойлик пудратчи Россия, АҚШ ва Жанубий Корея компаниялари вариантларини кўриб чиққандан сўнг энг мақбул техник ечимни таклиф қилган.

Компания раҳбари 2026 йил декабрь ойи охиригача тўртта қўшимча қудуқни бурғилашни бошлаш, авария оқибатларини эса 2027 йилнинг биринчи ярмида тўлиқ бартараф этиш режалаштирилганини айтди.

Август ойида «Ўзбекнефтгаз» Кофрун қишлоғи яқинидаги 604-сонли авариявий қудуқда ишлар бошланганини маълум қилди. Уларни амалга ошириш учун Хитойдан 40 бирликдан ортиқ махсус техника етказиб берилиши кўзда тутилган эди. Ўшанда ишларни якунлаш 2027 йил июль ойига режалаштирилган эди.

Эслатиб ўтамиз, 2024 йил 1 сентябрь куни коннинг 604-сонли қудуғида бурғилаш ишлари вақтида авария сабабли таркибида водород сульфиди юқори бўлган газ сизиб чиқиши юз берди, шунингдек, тўрт киши ҳалок бўлди. Маҳаллий аҳоли эвакуация қилинди. ЖИноят иши қўзғатилгани ҳақида хабар берилмаган.

2025 йил март ойида газ чиқиши бошқа — 202-сонли қудуқда юз берди. Кейинги чиқиндиларнинг олдини олиш учун кондаги газга ўт қўйилди.

М-25 кондаги газ захиралари 150−170 млрд кубометрга баҳоланмоқда. Кон Ўзбекистоннинг энг йирик ўзлаштирилмаган газ объектларидан бири ҳисобланади.

Музокараларнинг яна бир мавзуси Ўзбекистон ички бозорини таъминлаш учун нефть маҳсулотлари етказиб бериш манбаларини диверсификация қилиш бўлди. Аввалроқ «Ўзбекнефтгаз» Хитойдан Jet A-1 авиаёқилғисини узоқ муддатли етказиб беришни кўриб чиқаётганини маълум қилган эди.

Томонлар узоқ муддатли етказиб бериш механизмларини ишлаб чиқишга ва соҳавий компаниялар ишини мувофиқлаштиришга тайёр эканини билдирдилар.

Шу билан бирга, «Ўзбекнефтгаз» хабарида айнан қандай турдаги нефть маҳсулотларини етказиб бериш кўзда тутилаётгани, қайси ҳажмда ва қандай шартларда эканига аниқлик киритилмаган. Янги шартномалар имзолангани ҳақида ҳам хабар берилмаган.

Бундан ташқари, Тошкентда CNPC доимий ваколатхонасини очиш, қўшма лойиҳаларни мувофиқлаштириш учун маъмурий инфратузилмани яратиш ва ижтимоий ташаббусларни ривожлантириш бўйича таклифлар муҳокама қилинди.

Кадрлар тайёрлаш соҳасида томонлар муҳандис-техник мутахассисларни тайёрлаш учун И. М. Губкин номидаги Россия давлат нефть ва газ университетининг Тошкент филиалини қўллаб-қувватлаш имкониятини кўриб чиқдилар.