«Ўзбекнефтгаз» кунлик газ қазиб олиш ҳажмини 3,9 млн м³ га оширишни режалаштирмоқда
«Ўзбекнефтгаз» газ қазиб олишни кўпайтириш, қайта ишлаш маҳсулотлари ишлаб чиқаришни ошириш ва 2027 йилга тайёргарлик кўриш бўйича вазифаларни белгилади.
«Ўзбекнефтгаз» суткалик газ қазиб олишни 3,9 млн м³ га оширишни режалаштирмоқда
«Ўзбекнефтгаз» АЖ бошқаруви раиси Абдуғани Сангинов тўққиз ойлик давр якунига қадар янги қудуқларни ишга тушириш ҳисобига табиий газнинг суткалик қазиб олинишини 3,9 млн куб метрга оширишни таъминлаш бўйича топшириқ берди. Яна суткасига 460 минг куб метр газни 16 та қудуқни капитал таъмирлаш эвазига олиш кўзда тутилган.
Компаниядаги кенгайтирилган аппарат йиғилиши тўққиз ойлик кутилаётган ишлаб чиқариш-иқтисодий натижалар, мавжуд хавф-хатарлар ва йил якунига қадар бажарилиши лозим бўлган вазифаларга бағишланди.
Йиғилиш ўтказилган вақтда тўққиз ойлик давр якунланишига 24 кун қолган эди. Шу муносабат билан компания раҳбариятига ҳар бир йўналиш бўйича режалар ижросига эътибор қаратиш, мавжуд камчиликларнинг аниқ сабабларини белгилаш ва қисқа муддатларда зарур чораларни кўриш топширилди.
«Бугун ҳар бир йўналиш бўйича аниқ савол қўйилиши керак: нимани режалаштирган эдик, нимага эришдик, нима бажарилмай қолди, қолган қисқа фурсатда яна нималар қилиниши керак ва қандай натижага эришишимиз лозим?» — деди Абдуғани Сангинов.
Йиғилиш иштирокчилари табиий газ қазиб олиш режасининг бажарилишини алоҳида муҳокама қилдилар. Раҳбариятга белгиланган кўрсаткичларга эришиш учун қўшимча имкониятларни ишга солиш, қазиб олиш суръатларини ўтган йилнинг шу даврига нисбатан мос даражада сақлаб қолиш ва мавжуд захиралардан самарали фойдаланишни таъминлаш топширилди.
Бунинг учун ҳар бир кон, ҳар бир қудуқ ва объект бўйича вазият таҳлилини кучайтириш, ишларни манзилли ташкил этишни таъминлаш ва йиллик режани бажариш бўйича амалий чора-тадбирларни тезлаштириш зарур.
Йиғилишда, шунингдек, август ойида ишга туширилиши режалаштирилган қудуқлар бўйича якунлар сарҳисоб қилинди. Шу билан бирга, тўққиз ойлик давр якунига қадар сентябрь ойи режасида кўзда тутилган қудуқларни ишга тушириш вазифаси қўйилди. Бунинг ҳисобига суткалик қазиб олишни 3,9 млн куб метрга ошириш зарур.
Суткасига 460 минг куб метр ҳажмдаги қўшимча ўсиш 16 та қудуқни капитал таъмирлаш ҳисобига таъминланиши керак.
Қайта ишлаш соҳасида иштирокчилар газ конденсати, олтингугурт ва суюлтирилган газ ишлаб чиқаришни таҳлил қилдилар. Тизим корхоналарига йил якунлари бўйича ушбу маҳсулотларни ишлаб чиқариш ҳажмини белгиланган режага нисбатан 120 фоизга етказиш вазифаси қўйилди.
Шунингдек, нефть маҳсулотларини қайта ишловчи корхоналарни хомашё билан таъминлаш масаласи ҳам кўриб чиқилди.
Йиғилишнинг алоҳида блоки авариявий тўхташларнинг олдини олиш, куз-қиш даврига тайёргарлик кўриш, транспорт воситаларининг ҳолати, рақамлаштириш, ишлаб чиқаришни маҳаллийлаштириш ва инвестиция лойиҳаларини амалга оширишга бағишланди.
Хусусан, мутасадди шахсларга 1 октябрга қадар сиқув компрессор станцияларини ишга тўлиқ тайёрлаш топширилди.
Рақамлаштиришни муҳокама қилиш чорасида Абдуғани Сангинов жорий этилаётган ечимларнинг амалий самарадорлиги асосий мезон бўлиб қолиши кераклигини таъкидлади.
«Биз рақамлаштиришни тақдимотлар ва ҳисоботларда эмас, балки ишлаб чиқариш самарадорлигида кўришимиз керак», — деди бошқарув раиси.
Йиғилишда «E-Kon», «Пармалаш маркази», ERP ва BI тизимларини жорий этиш, шунингдек, нефть базаларида рақамлаштиришни якунлашнинг узил-кесил муддатлари белгиланди.
Шу билан бирга, компанияда 2027 йилга тайёргарлик кўриш бошлаб юборилди. Геология-қидирув ишлари, геология-техник тадбирлар дастурини, қазиб олиш ва ишлаб чиқариш балансини, манзилли қурилиш дастурини, инвестиция дастурини ва харидлар портфелини шакллантиришни тезлаштириш вазифалари қўйилди.
«Тўққиз ойлик даврни ижобий якунлаш учун бизда 24 кун бор. 24 кун — қисқа муддат. Аммо барча йўналишларда иш тўғри ташкил этилса ва кундалик назорат таъминланса, натижага эришиш мумкин. Ҳар бир раҳбар ўз йўналиши бўйича якуний натижа учун шахсан жавобгардир», — деди Абдуғани Сангинов.
Йиғилишнинг асосий вазифалари этиб белгиланган кўрсаткичлар ижросини кучайтирилган назорат остида таъминлаш, орқада қолишларни бартараф этиш, шунингдек, компаниянинг молиявий ва ишлаб чиқариш самарадорлигини ошириш белгиланди.