Ўзбекистоннинг 11 та футбол клуби ишончли бошқарувга топширилади
Ўзбекистондаги 11 та профессионал футбол клуби, жумладан «Пахтакор», «Бунёдкор», «Насаф» ва «Навбаҳор» бизнес вакилларига ишончли бошқарувга берилиши мумкин. Улар имтиёзларга эга бўлган ҳолда, клубларнинг йиллик харажатларининг камида 20 фоизини таъминлашлари керак. Ҳукумат 2030 йилгача профессионал футболни молиялаштиришни тўхтатишни режалаштирган эди.
Ўзбекистонда 11 та футбол клуби ишончли бошқарувга топширилади
Ўзбекистонда 11 та профессионал футбол клубини тадбиркорларга ишончли бошқарувга топшириш бўйича тендер эълон қилинади.
Бу клублар: «Бунёдкор», «Бухоро», «Динамо», «Қизилқум», «Навбаҳор», «Насаф», «Нефтчи», «Локомотив», «Машъал», «АГМК» ва «Пахтакор».
Шартларга кўра, клуб йиллик умумий харажатларининг камида 20 фоизи миқдорида йиллик ҳомийлик маблағларини тақдим этишга тайёр бўлган тадбиркор ёки тадбиркорлар гуруҳига топширилиши мумкин.
Ушбу чора Президентнинг 24 мартдаги спортни молиялаштириш механизмларини такомиллаштириш ва соҳага бизнес иштирокини кенгайтириш тўғрисидаги қарорида кўзда тутилган.
Профессионал футбол клубларини ишончли бошқарувга олган тадбиркорлар бир қатор имтиёзларга эга бўладилар. Юридик шахснинг фойда солиғини ҳисоблашда солиқ солинадиган фойда клубни молиялаштиришга йўналтирилган ҳомийлик ёрдами миқдорига камайтирилиши мумкин. Бироқ, ушбу чегирма солиқ солинадиган фойданинг 10 фоизидан ошмаслиги керак.
Ушбу клублар футболчилари жисмоний шахслардан олинадиган даромад солиғидан озод қилинади. Улар учун ижтимоий солиқ ставкаси 1 фоизни ташкил этади.
Тадбиркорлар, шунингдек, клубларни сотиб олиш ёки спорт иншоотларини қуриш, реконструкция қилиш ва капитал таъмирлаш учун тижорат банкларидан кредитлар олишлари мумкин бўлади.
Кредитлар йиллик 14 фоиз ставка билан бир йиллик имтиёзли давр билан беш йил муддатга берилади. Бунинг учун ликвидли гаров таъминоти ва истиқболли бизнес-режа талаб этилади. Бироқ, клуб балансидаги бинолар, иншоотлар ва ер участкалари гаров сифатида ишлатилиши мумкин эмас.
Бундан ташқари, клубларни бошқараётган тадбиркорлар Ўзбекистон Миллий телерадиокомпаниясининг марказий ва ҳудудий телеканалларида спортни тарғиб қилишга қаратилган кўрсатувлар вақтида ўз маҳсулот ва хизматларини реклама қилиш учун 50 фоизлик чегирмага эга бўладилар.
2026 йилги мавсумдан бошлаб Суперлига клублари илк бор тўғридан-тўғри давлат бюджетидан молиялаштирилади: 16 та клубнинг ҳар бири 35 миллиард сўмдан, 2027 йилда 30 миллиард сўмдан ва 2028 йилда 25 миллиард сўмдан олади. Аввалроқ ҳукумат 2030 йилга бориб профессионал футболни молиялаштиришни тўхтатиш ва клубларни бозор механизмларига ўтказишни режалаштираётгани хабар қилинган эди.
Давлат органлари балансида бўлган футбол клубларини сотиш Президентнинг 2023 йил март ойидаги қарорида кўзда тутилган эди. Тошкентнинг «Пахтакор» клуби 2024 йил январ ойида 24,1 гектар ер майдони билан бирга аукционга қўйилган эди. Бироқ, кейинчалик хусусийлаштириш жараёни тўхтатиб турилди.