Ўзбекистонлик ёш шахматчилар Испаниядан бешта медаль олиб келишди
Ўзбекистонлик ёш шахматчилар Испаниядан бешта медаль олиб келишди
Ўзбекистонлик ёш шахматчилар Испанияда бўлиб ўтган 7 ёшдан 17 ёшгача бўлган ўйинчилар ўртасидаги FIDE World Championships шахмат бўйича жаҳон чемпионатида бешта медални қўлга киритишди. Терма жамоа ҳисобида — битта олтин, учта кумуш ва битта бронза мукофоти бор.
13 ёшгача бўлган қизлар ўртасида Лазизабону Комилжонова жаҳон чемпиони бўлди. У ўз ёш тоифасида биринчи ўринни эгаллади.
Яна уч нафар Ўзбекистон вакили кумуш медаль совриндори бўлди. Сайфуддин Эркинбоев 9 ёшгача бўлган ўғил болалар ўртасида, Сарвиноз Бегмуратова — U13 қизлар ўртасида, Акбар Мустафақулов эса — U11 ўғил болалар ўртасида иккинчи ўринни эгаллади.
11 ёшгача бўлган қизлар ўртасидаги бронза медални Ҳуснорахон Ҳуснитдинова қўлга киритди.
Терма жамоанинг бошқа иштирокчилари ҳам муносиб натижаларни кўрсатишди. Аминабону Зоҳирова 9 ёшгача бўлган қизлар ўртасида бешинчи ўринни эгаллади, Фазлиддин Фарҳодов эса ушбу ёш тоифасидаги ўғил болалар ўртасида еттинчи бўлди.
Аввалроқ ўзбекистонлик етти ёшли шахматчи Муҳаммадюсуф Баҳромов максимал 9 очкодан 8 очко жамғариб, мактаб ўқувчилари ўртасидаги Осиё чемпионатининг олтин медалини қўлга киритган эди.