Ўзбекистонлик мутахассислар меҳмонхона менежменти бўйича Австрия стандартлари асосида ўқитилади
Ўзбекистонлик мутахассислар меҳмонхона менежменти бўйича Австрия стандартлари асосида ўқитилади
Ўзбекистонлик мутахассислар ва тренерлар меҳмонхона бизнесини бошқаришнинг замонавий усуллари бўйича Австрия стандартлари асосида тайёрланади. Тегишли келишув Вена шаҳрида Ўзбекистон Касбий таълим агентлиги ва Австриянинг IMC Krems амалий фанлар университети томонидан имзоланди.
Мутахассисларни тайёрлаш Чортоқ туманидаги 1-сонли техникум ҳамда Бухоро туризм ва маданий мерос техникуми базасида ташкил этилади.
Ташриф давомида Ўзбекистон делегацияси Австриянинг касбий таълим тизими билан ҳам танишди. Хусусан, томонлар дуал таълим модели, техник коллежларни молиялаштириш механизмлари, мутахассислар тайёрлашда иш берувчиларнинг иштироки ва битирувчиларни кейинчалик ишга жойлаштириш масалаларини муҳокама қилдилар.
Бундан аввал Ўзбекистон 2026–2027 йилларда МДҲ Туризм бўйича кенгашига раислик қилиши хабар берилган эди. Республика соҳа учун малакали кадрлар тайёрлашни ва соҳавий таълим муассасалари ўртасидаги ҳамкорликни кенгайтиришни устувор вазифалар қаторида белгилаб олди.