Ўзбекистонлик аёл тўйдан кейиноқ 100 минг долларлик тиллаларни олиб, туркиялик куёвдан қочиб кетди
Ўзбекистонлик аёл турк фуқароси билан тўйидан кейин 100 минг долларлик тиллаларни олиб ғойиб бўлди
Туркияда уч кунлик тўйдан кейин Ўзбекистон фуқароси ғойиб бўлди. Эрининг сўзларига кўра, у билан бирга тахминан 5 миллион лиралик (104 минг доллар) тилла тақинчоқлар ва мобил телефон ҳам йўқолган. Кейинчалик аёлнинг ўзи полицияга келиб, айбловларни рад этди ва уйдан зўравонлик ҳамда таҳдидлар туфайли кетганини маълум қилди.
Тўй 18 август куни Муғла вилоятининг Милас туманида бўлиб ўтди ва уч кун-у уч кеча давом этди. Тантаналар доирасида анъанавий мойли кураш мусобақалари ўтказилди. Уларни ташкил этиш учун куёвнинг ота-онаси қарийб 1,5 миллион лира сарфлади, ғолибга мукофотни эса келиннинг ўзи топширди.
Тантаналар якунлангач, аёл уйни тарк этган. Эри полицияга мурожаат қилиб, хотини ўзи билан бирга тахминан 5 миллион лиралик тилла тақинчоқлар, 300 минг лира нақд пул ва мобил телефонни олиб кетганини маълум қилган.
Шундан сўнг полиция қидирув ишларини бошлади. Ҳуқуқ-тартибот идоралари ходимлари автобус йўналишлари ва меҳмонхоналар маълумотлари орқали аёлнинг қаердалигини аниқлашга ҳаракат қилишди.
Кейинчалик у ўзи полиция маҳкамасига келган. Ўз баёнотида аёл эри айтган барча мол-мулкни олиб кетганини рад этди. Унинг сўзларига кўра, кетган куни у онасининг уйига йўл олган ва ўзи билан фақат 20 та тилла танга ва 226 минг лира нақд пул олган. Аёл, шунингдек, эри томонидан зўравонлик ва таҳдидларга учраганини даъво қилди. У турмуш ўртоғи ва қайнотаси устидан шикоят аризаси ёзиб, далил сифатида ёзишмаларнинг скриншотларини полицияга топширди.
Эри эса, ўз навбатида, зўравонлик айбловларини рад этди ва хотини ҳамда унинг отаси томонидан ҳақорат ва таҳдидларга учраганини маълум қилди.
Кўрсатма берганидан кейин аёл қўйиб юборилди. Тергов давом этмоқда, ҳуқуқ-тартибот идоралари ходимлари воқеа тафсилотларини ва йўқолган тилла тақинчоқларнинг тақдирини аниқлаштирмоқда.
«Ойбек» постида рентген текшируви давомида фуқаро аёл 180,8 грамм тақинчоқларни интим соҳасига яшириб, олиб ўтмоқчи бўлгани аниқланди.