Ўзбекистонда юк вагонлари парки юқори талаб ва эскириш туфайли кенгайтирилади — вазир
Ўзбекистонда юк вагонлари паркини бизнеснинг юқори талаби ва ҳаракатланувчи таркиб бир қисмининг сезиларли даражада эскиргани фонида кенгайтириш режалаштирилмоқда. Транспорт вазирлиги буни темир йўл соҳасининг ўсиш нуқталаридан бири деб атамоқда. Шу билан бирга, расмийлар Тошкент — Самарқанд алоҳида юқори тезликдаги йўналиши бўйича таклифлар тайёрламоқда.
Ўзбекистонда юк вагонлари парки юқори талаб ва эскириш туфайли кенгайтирилади — вазир
Ўзбекистонда ишлаб чиқарувчилар ва савдо компаниялари томонидан юқори талаб мавжудлиги фонида юк вагонлари паркини кўпайтириш режалаштирилмоқда.
«Темир йўл транспортидаги ўсиш нуқталаридан бири — бу юк вагонлари паркини кўпайтиришдир. Бугунги кунда ишлаб чиқарувчилар ва савдо билан шуғулланувчи компаниялар томонидан уларга юқори талаб мавжуд. Бундан ташқари, вагонларнинг сезиларли қисми эскирган», — деди у.
Вазирнинг сўзларига кўра, Хитой — Қирғизистон — Ўзбекистон темир йўл магистрали ишга туширилгандан сўнг темир йўл инфратузилмасига қўшимча эҳтиёж пайдо бўлади.
«Ўзбекистон темир йўллари» бошқаруви раиси Зуфар Нарзуллаев ҳам 2026 йилда Тошкент — Самарқанд йўналишидаги тўққизта станция реконструкция қилинганини, 15 сентябрда эса 28 километрлик Ховос — Даштабод электрлаштирилган участкаси фойдаланишга топширилганини маълум қилди.
Бундан ташқари, жорий йилда Навоий — Бухоро йўналишида юқори тезликдаги ҳаракат учун 96 километрлик темир йўл инфратузилмаси фойдаланишга топширилди.
«Президент Тошкент — Самарқанд алоҳида юқори тезликдаги темир йўл линияси қурилишига алоҳида эътибор қаратди. Ушбу масала бўйича йил якунига қадар тегишли таклиф ва ҳисоботларни тайёрлаймиз», — деди у.
Нарзуллаев, шунингдек, орттирилган тажрибадан кейинчалик мамлакат ичидаги юқори тезликдаги темир йўл лойиҳаларида фойдаланиш учун Хитой — Қирғизистон — Ўзбекистон темир йўли қурилишида ўзбекистонлик мутахассислар иштирок этиши зарурлигини таъкидлади.
Июль ойида президент Шавкат Мирзиёев хусусий сектор иштирокида ҳамкор давлатлардан 10 мингта бўш юк вагонини жалб қилиш устида ишлаш бўйича топшириқ берган эди. Унинг сўзларига кўра, мамлакат ташқи савдо юкларининг қарийб 70 фоизи ёки 46 млн тоннаси темир йўл орқали ташилади, бироқ бизнес вакиллари ҳали ҳам вагонлар етишмаслигидан шикоят қилмоқда. Иккинчи ярим йилликда яна 1300 та вагон ишлаб чиқариш режаси етарли эмас деб топилган.
Шунингдек, расмийлар темир йўл инфратузилмасини ривожлантириш учун Жаҳон банкининг 200 млн доллар маблағини жалб қилишни режалаштирмоқда. 2030 йилгача 151 км янги йўллар қуриш, 182 км мавжуд линияларни электрлаштириш ва 27 та станцияни модернизация қилиш кўзда тутилган.
Эслатиб ўтамиз, Ўзбекистон Туркиянинг Самсун ва Истанбул портларига чиқиш имконини берувчи Нахичеван темир йўли қурилишида иштирок этиш имкониятини кўриб чиқмоқда. Аввалроқ Озарбайжон лойиҳани амалга ошириш учун халқаро консорциум тузишни таклиф қилган эди.