Ўзбекистонда Yandex Go сервиси билан 700 нафар кар ва эшитиши заиф ҳайдовчилар ҳамкорлик қилмоқда
Эшитишида нуқсони бўлган ва заиф эшитувчи ҳайдовчилар беш йил давомида Yandex Go орқали 850 мингта сафарни амалга оширдилар. Ҳозирги вақтда Ўзбекистонда ушбу сервис билан 700 нафар шундай ҳайдовчи ҳамкорлик қилмоқда, улар ойига ўртача 35 мингта буюртмани бажармоқда — бу икки йил аввалгига қараганда икки баравар кўп.
Ўзбекистонда Yandex Go сервиси билан 700 нафар кар ва эшитиши заиф ҳайдовчи ҳамкорлик қилмоқда. Беш йил ичида улар 850 мингта сафарни амалга оширди, деб хабар берди «Газета»га Yandex Uzbekistan матбуот хизмати.
Ҳозирда бундай ҳайдовчилар ойига ўртача 35 мингта буюртма бажармоқда — бу икки йил аввалгига қараганда икки баравар кўп, дея қайд этди компания.
Хабарда айтилишича, Yandex Go сервиси билан ишлаш эшитиш қобилияти бўйича ногиронлиги бўлган ҳайдовчилар учун мослаштирилган. Платформага уланиш телефон қўнғироқларисиз амалга оширилади, Yandex Pro иловасидаги тренинглар ишора тилида тақдим этилган, қўллаб-қувватлаш хизмати ва йўловчилар билан мулоқот эса матнли форматга ўтказилган.
Янги буюртма келиб тушганда, смартфон экрани милтиллай бошлайди, қурилма эса тебранади. Ҳайдовчи ва йўловчи ўртасидаги матнли чат бутун сафар давомида фаол бўлади, ваҳоланки оддий режимда у йўловчи машинага ўтирганидан кейин ёпилади. Йўловчилар ва қўллаб-қувватлаш хизмати ходимлари учун овозли қўнғироқлар ўчириб қўйилган.
Автомобилларда, шунингдек, ҳайдовчи ва йўловчига сафар давомида мулоқот қилишга ёрдам берадиган махсус ғилофлар ва карточкалар жойлаштирилади. Компаниянинг таъкидлашича, ҳайдовчиларнинг эшитиш хусусиятлари йўловчиларнинг баҳоларига ва сафарлар хавфсизлигига таъсир қилмайди.
Кар ва эшитиши заиф ҳайдовчилар сервис билан ўзини ўзи банд қилган шахс сифатида ёки таксопарклар орқали ҳамкорлик қилишлари мумкин. Охиргилари учун компания эшитиш хусусиятларига эга одамлар билан ўзаро алоқа ва мулоқот қилиш бўйича эслатма тайёрлади.
«Бугунги кунда Ўзбекистонда инклюзив муҳитни ривожлантириш технологиялар билан бевосита боғлиқ. Платформани кар ва эшитиши заиф инсонларнинг қабул қилиш хусусиятларига мослаштириш инклюзияни бир марталик ташаббуслар тоифасидан мунтазам амалиётга айлантиради. Лойиҳа статистикаси бундай воситаларга талаб борлигини исботламоқда: улар одамларга ўз касбида ўзларини намоён қилишга ёрдам беради ва жамиятда ўзаро ҳурмат маданиятини мустаҳкамлайди», — деб таъкидлади Президент ҳузуридаги Ижтимоий ҳимоя миллий агентлиги директори ўринбосари Усмон Шарифхўжаев.
«Yandex Uzbekistan ногиронлиги бўлган шахсларнинг касбий жиҳатдан ўзларини намоён қилишлари учун изчил равишда имкониятлар яратмоқда. Биз нафақат Yandex Taxi, балки бошқа сервисларни ҳам, масалан, Yandex Lavka’ни ҳам мослаштирмоқдамиз. Яқинда сервис эшитиш қобилияти бўйича ногиронлиги бўлган омбор мутахассислари учун бўш иш ўринларини очди. Энг муҳими, биз бу ишларни давлат ва жамоат ташкилотлари билан биргаликда ҳамда одамларнинг ўзларидан олинадиган қайта алоқага таянган ҳолда олиб бормоқдамиз. Тажриба ва ресурсларнинг бирлаштирилиши улар кимга мўлжалланган бўлса, ўшаларнинг реал эҳтиёжларига жавоб берадиган тизимли ечимларни яратиш имконини беради», — деди Yandex Uzbekistan вице-президенти Сардор Қодиров.